Դիարբեքիրի պատմական հայկական Սուրբ Կիրակոս եկեղեցին, որ վերաբացվել էր 2011-ին, վերջին ամիսների թուրք-քրդական բախումների հետեւանքով վնասվել է։
Ինչպես NEWS.am-ին հայտնեցին Դիարբեքիրի բնակիչները, Դիարբեքիրի Սուրի շրջանում գտնվող հայկական Սուրբ Կիրակոս եկեղեցին վերջին 2 ամիսը փակվել է։
Բախումների հետեւանքով կոտրվել են եկեղեցու պատուհանները, եկեղեցու պատերին երեւում են կրակած փամփուշտների տեղերը։
Բնակիչների խոսքով՝ վերջին օրերին թուրքական զինուժի կողմից ինտենսիվ կրակոցներից հետո դեռ հայտնի չէ ինչ վիճակում է հայտնվել Սուրբ կիրակոսը, քանի որ Սուրի շրջանում շարունակվում է փողոց դուրս գալու արգելքը։
Նշենք, որ Մերձավոր Արեւելքի ամենամեծ եկեղեցիներից մեկի՝ Սուրբ Կիրակոսի վերաբացումն ու օծումը տեղի է ունեցել 2011-ի հոկտեմբերի 22-ին, իսկ առաջին պատարագը մեկ օր անց՝ հոկտեմբերի 23-ին:
Սուրբ Կիրակոսի վերանորոգումը իրականացվել է դիարբեքիրցի հայերի եւ Դիարբեքիրի քաղաքապետարանի աջակցությամբ:
Սուրբ Կիրակոսը վերաբացվել է որպես գործող եկեղեցի:
