ՌԴ վարչապետ Դմիտրի Մեդվեդեւը կառավարության նիստում հայտնել է Թուրքիայի ոչ բարեկամական գործողություններին ի պատասխան այդ պետության դեմ Ռուսաստանի կողմից նոր սահմանափակող միջոցների մասին։ Այս մասին «Ռոսիա 24»-ի հետ զրույցում ասել է ՌԴ փոխվարչապետ Արկադի Դվորկովիչը։
«Կլինեն գործողություններ, որոնց մասին կհայտարարվի։ Կառավարության նախագահը նիստերի ժամանակ արդեն ասել է այդ մասին»,- մեջբերում է Դվորկովիչի խոսքը ՏԱՍՍ-ը։
Միաժամանակ Դվորկովիչը նշել է, որ կառավարությունը խնդիր չի դրել ամբողջովին հրաժարվել Թուրքիայի հետ համագործակցությունից։ «Մենք կարծում ենք, որ ոչ բարեկամական գործողություններին համարժեք պատասխան է պետք»,- ընդգծել է ՌԴ փոխվարչապետը։
Հիշեցնենք, որ ՌԴ նախագահ Վլադիմիր Պուտինը նոյեմբերի 28-ին հրաման էր ստորագրել, որի համաձայն՝ Ռուսաստան ներկրվող թուրքական որոշ ապրանքատեսակների վրա սահմանափակումներ են դրվում։
