Գյումրիում 1 տարի առաջ սպանված Ավետիսյանների հարազատները պահանջում են, որ սպանության գործով նիստերն անցկացվեն նորմալ պայմաններում: Այսօր՝ հունվարի 16-ին, նրանք հենց այս պահանջով են հավաքվել Գյումրիի կենտրոնական հրապարակում:
«Մենք որոշեցինք մասնակցել դատական նիստերին՝ անկախ նրանից, թե որտեղ են դրանք տեղի ունենում: Թող մեզ ապահովեն նորմալ պայմաններ, որ մենք կարողանանք էդ Պերմյակով կոչվածի ձայնը լսել, հասկանանք՝ ինչ է խոսում: Մենք անգամ չենք հասկանում, թե դատական նիստը երբ է սկսվում եւ ավարտվում, ոչ նստելու, ոչ էլ կանգնելու տեղ ունենք: Մեր փաստաբանները երկուշաբթի օրը դատական նիստին այս պահանջով միջնորդություն կներկայացնեն»,- լրագրողներին ասաց սպանված Ավետիսյանների հարազատներից Ռիտա Պետրոսյանը:
Ավետիսյանների հարազատների բողոքի ակցիային միացել են նաեւ տուժողների իրավահաջորդների ներկայացուցիչները: Տարածքը հսկում են ոստիկանները:
Նշենք, որ դեկտեմբերի 18-ին կայացած առաջին դատական նիստից հետո փաստաբանները դահլիճի պայմանները որակեցին «անմարդկային»: Հիշեցնենք, որ այդ օրը տուժողների իրավահաջորդների ներկայացուցիչներից եւ փաստաբաններից մի քանիսի համար նստարաններ չկային, դատավորը ստիպված ընդմիջեց նիստը՝ այս հարցը լուծելու համար: Նիստի ամբողջ ընթացքում նրանք դժգոհեցին պայմաններից, իսկ հետո էլ հարազատները հայտարարեցին, որ կբոյկոտեն նիստերը, եթե դրանք շարունակվեն անցկացվել ռազմաբազայի տարածքում:
Շիրակի մարզի ընդհանուր իրավասության դատարանի փոխանցմամբ՝ երկրորդ դատական նիստը՝ հունվարի 18-ին, նույնպես կանցկացվի ռազմաբազայի տարածքում՝ նույն դահլիճում:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը դեկտեմբերի 18-ին սկսել է դատավարությունը:
