Վանի Աղթամար կղզու Ս.Խաչ եկեղեցու գմբեթին խաչ տեղադրելու հետ կապված, վերջին օրերին թուրքական մամուլում տեղեկություններ էին հայտնվել, թե Վանի գործարարները նախատեսում են անձամբ լուծել խաչի հետ կապված խնդիրը` իրենց ուժերով խաչը տանելով կղզի եւ հատուկ սարքավորումներով տեղադրել: Այս խոսակցությունների հետքերով, NEWS.am-ի թղթակիցը զրուցել է Թուրքիայի ճամփորդական ընկերությունների միության (TURSAB) Վանի նահանգային կառույցի նախագահ Աբդուլլահ Թունչդեմիրի հետ:
Մեր այն հարցին, թե իրականում նախատեսվա՞ծ են որեւէ աշխատանքներ խաչը մինչեւ պատարագ տեղադրելու հետ կապված, Թունչդեմիրը պատասխանեց. «Գիտեք, կարեւորը այն է, որը խաչ տեղադրելու թույլտվությունը արդեն կա: Հնարավոր է հասցնենք մինչ պատարագ, հնարավոր է` ոչ: Սակայն, խաչը անպայման տեղադրվելու է: Խնդրում եմ, դա մեծ հարց մի դարձրեք: Մենք զբաղվում ենք այդ հարցով, հանդիպումներ ենք ունենում քննարկումներ ենք կազմակերպում, աշխատում ենք խաչը տեղադրել մինչ պատարագ, սակայն վերջնական որոշումը կախված է նահանգապետից»: Աբդուլլահ Թունչդեմիրը իր խոսքում նշեց, թե ամեն ինչ միանգամից դժվար է անել: «Աղթամարը վերանորոգվեց, բացվեց պատարագի համար ու խաչն էլ անպայման կտեղադրվի: Պետական գործընթացը մի քիչ դանդաղ է ընթանում, բայց ընթանում է: Խնդրում եմ, միայն լավը գրեք: Եթե հնարավոր եղավ, մինչեւ պատարագ կտեղադրենք: Մենք ուզում ենք ամեն ինչ լավ լինի, բարեկամության եւ հանդուրժողականության մթնոլորտում լինի»-նշեց Թունչդեմիրը`վերջում կրկին խնդրելով, որ գրենք միայն լավը:
Նշենք, որ Վանի նահանգապետի կարգադրությամբ, արդեն Աղթամարում սկսվել են կահավորման աշխատանքները: Կղզում լրատվամիջոցների հանգիստ աշխատանքի համար հատուկ վրան են պատրաստել: