Համաշխարհային շուկայում պղնձի եւ մոլիբդենի գների անկումն իսկապես անհանգստացնող է: Այս մասին, այսօր՝ հունվարի 26-ին, էներգետիկայի եւ բնական պաշարների նախարարությունում աշխատանքային խորհրդակցության ժամանակ նշել է նախարար Երվանդ Զախարյանը:
Նրա խոսքով՝ հանքահումքային ապրանքների միջազգային շուկաներում վերջին շրջանում արձանագրվող դրսեւորումները լուրջ դժվարություններ են ստեղծել նաեւ ոլորտի հայաստանյան ընկերությունների համար։
Խորհրդակցությանը մասնակցել են հանքարդյունաբերության ոլորտում գործող մի շարք ընկերությունների եւ շահագրգիռ գերատեսչությունների ներկայացուցիչներ:
Զախարյանը նշել է, որ անհրաժեշտ է համախմբել ջանքերը՝ իրավիճակից ելքեր գտնելու եւ ոլորտի ընկերությունների մոտ առաջացած դժվարությունները համատեղ ուժերով հաղթահարելու համար։ Առավել եւս, որ տնտեսության այս ճյուղն ունի նաեւ կարեւոր սոցիալական նշանակություն։ Այն ապահովում է մի քանի հազար աշխատատեղ, որոնց կրճատումն, առկա սոցիալական պայմաններում, անթույլատրելի է։
Փաստելով արտաքին շուկաներում ձեւավորված գների պայմաններում առաջացած դժվարությունները՝ խորհրդակցությանը մասնակցող ընկերությունների ներկայացուցիչները ներկայացրեցին իրենց հուզող խնդիրները, ինչպես նաեւ այն առաջարկությունները, որոնք կարող են մեղմել գների անկման ազդեցությունը։ Դրանք վերաբերում էին ինչպես օրենսդրական փոփոխություններին, այնպես էլ ֆինանսական հնարավոր աջակցության տրամադրմանը։
Ամփոփելով խորհրդակցությունը՝ Ե. Զախարյանը տեղեկացրեց, որ բարձրացված հարցերը կարճ ժամանակահատվածում կքննարկվեն շահագրգիռ նախարարությունների հետ եւ դրանց հիման վրա առաջարկություններ կներկայացվեն կառավարությանը՝ խնդիրներին լուծումներ տալու նպատակով։ Ստեղծված իրավիճակում նախարարը միաժամանակ կարեւորեց ընկերություններում աշխատանքների առավել արդյունավետ կազմակերպման անհրաժեշտությունը։