ԵԱՀԿ Մինսկի խումբը ղարաբաղյան հակամարտության կարգավորման միակ ձեւաչափն է։ Այս մասին հունվարի 26-ին ԵԽԽՎ ձմեռային նստաշրջանում ելույթ ունենալիս ասել է շվեդ պատգամավոր, Եվրոպական միացյալ ձախեր քաղաքական խմբի անդամ Լոտա Ֆորնավրե Ջոնսոնը։
Նրա համոզմամբ պետք է հաշվի առնել հակամարտության բոլոր կողմերի դիրքորոշումը։ «Բայց մենք տեսնում ենք, որ զեկուցողներն այցելել են միայն Ադրբեջան եւ չեն եղել ո՛չ Լեռնային Ղարաբաղում, ո՛չ Հայաստանում։ Մենք տեսել ենք, թե ինչպես է ինտենսիվանում հակամարտությունը։ Երկու կողմից էլ զոհեր են եղել այդ թվում խաղաղ բնակչության շրջանում»,- հիշեցրել է Ջոնսոնը՝ առաջարկելով զեկույցը վերադարձնել ԵԽԽՎ քաղաքական եւ ժողովրդավարության հարցերով հանձնաժողովին։ Պատգամավորը խորհուրդ է տվել առհասարակ չընդունել զեկույցը։
Սոցիալիստների խմբի ֆրանսիացի պատգամավոր, ԵԽԽՎ փոխնախագահ Ռենե Ռուկեի խոսքով՝ անհրաժեշտ է հակամարտությունը լուծել խաղաղ ճանապարհով։ «Հակամարտող կողմերի նկատմամաբ պետք է չեզոքություն ապահովել։ Իրականում զեկույցները չեն բավարարում այս պայմաններից ոչ մեկը»,- ընդգծել է Ռենե Ռուկեն։
Ավելի վաղ ԵԽԽՎ–ն քվեարկությամբ մերժել էր բրիտանացի պատգամավոր Ռոբերտ Ուոլթերի «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» թեմայով զեկույցը, սակայն ընդունել էր բոսնիացի պատգամավոր Միլիցա Մարկովիչի «Ադրբեջանի սահմանամերձ շրջանների բնակիչները միտումնավոր զրկված են ջրից» թեմայով հակահայկական զեկույցը։
