Եթե ԵԽԽՎ-ն ԵԱՀԿ Մինսկի խմբին զուգահեռ ինչ-որ գործընթաց սկսի, դա միայն կվատթարացնի իրավիճակը։ Այս մասին հունվարի 26-ին ԵԽԽՎ ձմեռային նստաշրջանում ելույթ ունենալիս ասել է գերմանացի պատգամավոր, Սոցիալիստների խմբի ներկայացուցիչ Դորիս Բարնեթը։
Նա կոչ է արել չքվեարկել հակահայկական զեկույցների օգտին։ «Անհրաժեշտ է զեկույցները վերադարձնել Հանձնաժողովներին եւ եւս մեկ անգամ քննարկել դրանք։ Հայաստանի եւ Ադրբեջանի միջեւ ձգձգված հակամարտությունը է, եւ այդ հակամարտությունը ռազմական լուծում չունի։ ԵԽԽՎ-ն զբաղվում է մարդու իրավունքների հարցերով։ Դա է մեր խնդիրը։ Իսկ անվտանգության հարցերն ուրիշ խնդիր են»,- ընդգծել է Բարնեթը։
Նա նշել է, որ ավելի քան 20 տարի ՄԽ անդամ երկրները եւ հակամարտ կողմերը փորձում են ապահովել լարվածության թուլացումը։ «ԵԱՀԿ ՄԽ-ն այդ հակամարտությունը կարգավորող միակ ձեւաչափն է, որն ընդունում են բոլոր կողմերը։ Եթե նայենք Մադրիդյան սկզբունքները, ապա մենք պետք է ջանանք վերադառնալ եւ վերանայել այդ զեկույցների բովանդակությունը, քանի որ մենք պետք է աջակցենք Մինսկի խմբին։ Մենք պետք է ապահովենք անաչառ զեկույց»,- հավելել է Բարնեթը։