Գյումրիում ռուսական ռազմաբազայի տարածքում գտնվող դատարանում այսօր՝ հունվարի 29-ին, մեկնարկել է Ավետիսյանների ընտանիքի սպանության գործով հերթական դատական նիստը:

Նախորդ դատական նիստը՝ հունվարի 22-ին, հետաձգվել էր երբ գործով վկաներ, Ավետիսյանների դուստրեր Լուսինե Ավետիսյանը, Անահիտ Կոշտոյանը եւ փեսան՝ Եգոր Ադամյանը վատ ինքնազգացողության պատճառով խնդրել էին դատավորին իրենց հարցաքննել մեկ այլ օր։

Նախորդ նիստի ժամանակ ամբաստանյալ Վալերի Պերմյակովն իրեն մեղավոր էր ճանաչել առաջադրված բոլոր մեղադրանքներում՝ առանձնակի դաժանությամբ իրականացված սպանության, ավազակության և Հայաստանի պետական սահմանը հատելու փորձի:

Նշենք, որ դեռեւս հունվարի 18-ին կայացած դատական նիստի ժամանակ տուժողների իրավահաջորդների ներկայացուցիչները միջնորդել էին, որպեսզի դատական նիստերն անցկացվի Շիրակի մարզի ընդհանուր իրավասության դատարանի շենքում, սակայն դատարանը մերժել էր այն: Մերժվել էր նաեւ դատավորի ինքնաբացարկի միջնորդությունը:

Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:

Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:

Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:

Հայկական կողմը 2015թ. դեկտեմբերի 18-ից սկսել է դատաքննությունը: Նիստերը տեղի են ունենում ռուսական ռազմաբազայի տարածքում: Նշենք, որ հունվարի18-ին նախորդ դատական նիստը նույնպես սկսվել էր ուշացումով։

Դատարանի վճռով նիստն ընթանալու է ուրբաթ օրերին։