ԵԽԽՎ ձմեռային նստաշրջանում ընդունած Միլիցա Մարկովիչի հակահայկական զեկույցը հայկական կողմի համար ոչ մի մահացու բան չի պարունակում։ Այս մասին հունվարի 29-ին կայացած մամուլի ասուլիսի ժամանակ ասել է Քաղաքական եւ միջազգային հետազոտությունների հայկական կենտրոնի փորձագետ Ռուբեն Մեհրաբյանը՝ պատասխանելով NEWS.am-ի թղթակցի հարցին, թե ինչ հետեւանքներ կունենա այդ զեկույցը։

Նրա խոսքով՝ դրա ընդունման փաստն իհարկե տհաճ է, քանի որ նրանում սխալ դրույթներ կան, որոնք վնաս են հասցնում ոչ միայն Հայաստանին, այլեւ ողջ բանակցային գործընթացին։ «Ի՞նչ է ցանկանում Ադրբեջանը։ Ադրբեջանը ոչ թե ջուր է ուզում, այլ հսկողություն։ Լեռնային Ղարաբաղի Հանրապետության իշխանությունները բազմիցս Ադրբեջանին առաջարկել են քննարկել եւ համաձայնության գալ Սարսանգի ջրամբարի ջրային ռեսուրսների օգտագործման հարցում, սակայն Բաքուն պատասխանել է, որ չի ուզում խոսել «անջատողականների» հետ, իսկ հետո էլ բողոքել է միջազգային մարմիններին»,- նշել է Մեհրաբյանը։

Փորձագետը հավելել է, որ անհրաժեշտ է աշխատել համապատասխան խմբի հետ, որը կայցելի Լեռնային Ղարաբաղ եւ նրանց պարապես ներկայացնել ճշմարտությունն այն մասին, որ ադրբեջանական կողմը հրաժարվում է այդ հումանիտար-տեխնիկական հարցով բանակցել ղարաբաղյան կողմի հետ։

Հիշեցնենք, որ ԵԽԽՎ–ն հունվարի 26-ին քվեարկությամբ մերժել էր բրիտանացի պատգամավոր Ռոբերտ Ուոլթերի «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» թեմայով զեկույցը,  սակայն ընդունել էր բոսնիացի պատգամավոր Միլիցա Մարկովիչի «Ադրբեջանի սահմանամերձ շրջանների բնակիչները միտումնավոր զրկված են ջրից» թեմայով հակահայկական զեկույցը։