Հայկական կողմը քննարկում է Իրան-Հայաստան երկաթգծի բոլոր հնարավոր երթուղիները։ Այս մասին NEWS.am-ի հետ զրույցում ասել է տրանսպորտի եւ կապի առաջին փոխնախարար Արթուր Առաքելյանը։
Հիշեցնենք, որ Իրան կատարած այցելության ընթացքում տրանսպորտի եւ կապի նախարար Գագիկ Բեգլարյանը անդրադարձել էր Իրան-Հայաստան երկաթուղու շինարարությանը։ Իրանական կողմին առաջարկվել է Հայաստան տանող նոր երթուղի՝ Մեղրիից եւ Վայոց Ձորի մարզից, բայց ոչ թե դեպի Սեւան, այլ Երասխ։
«Քանի որ նախագիծը իրականացման փուլ դուրս չի եկել, քննարկվում են բոլոր հնարավոր երթուղիները»,- ասել է փոխնախարարը։
Նշենք, որ հիմա 2 չինական ընկերություն անհատույց հիմունքներով նախագծի տեխնիկա-տնտեսական հիմնավորում են իրականացնում։
Ինչպես ավելի վաղ NEWS.am-ին հայտնել էր Հայաստանի Տրանսպորտի նախարարության կառույցում «Երկաթուղու շինարարության տնօրինություն» ՓԲԸ-ի տնօրեն Աշոտ Շահնազարյանը, երկաթուղու շինարարության ժամկետը կազմում է 6 տարի, գնելիությունը՝ 28 տարի, շահագործումը՝ 50 տարի: Սպասվում է, որ աշխատանքները կսկսվեն 2015թ.-ի առաջին եռամսյակում: Շինարարության արժեքը կարող է կազմել 3.5 մլրդ դոլար:
