Ադրբեջանի նախագահ Իլհամ Ալիեւն ու Թուրքիայի վարչապետ Ռեջեփ Թայիփ Էրդողանը սեպտեմբերի 15-ին Ստամբուլում, թյուրքալեզու երկրների ղեկավարների գագաթաժողովի շրջանակներում համաձայնագիր են ստորագրել` երկու երկրների միջեւ ռազմավարական համագործակցության Բարձր խորհուրդ ստեղծելու մասին:
Ավելի վաղ NEWS.am-ը տեղեկացրել էր, որ նույն գագաթաժողովի շրջանակներում, հանդիպել են Թուրքիայի եւ Ադրբեջանի նախագահներ Աբդուլա Գյուլն ու Իլհամ Ալիեւը:
Հանդիպումը փակ է եղել եւ լրատվամիջոցների ներկայացուցիչներին թույլ չեն տվել ներկա լինել այդ հանդիպմանը: Հանդիպմանը մասնակցել է նաեւ Թուրքիայի էներգետիկայի նախարար Թաներ Յըլդըզը:
Նշենք, որ թյուրքալեզու երկրների ղեկավարների գագաթաժողովին ներկա են եղել 5 երկրների նախագահներ` Թուրքիայի, Ադրբեջանի, Ղազախստանի, Թուրքմենստանի եւ Ղրղըզստանի: Ուզբեկստանը գագաթաժողովում ներկայացրել է այդ երկրի նախագահի ներկայացուցիչը: Գագաթաժողովն իր աշխատանքները կավարտի սեպտեմբերի 16-ին:
