Թյուրքալեզու երկրների ղեկավարների Ստամբուլում ընթացող գագաթաժողովի շրջանակներում տեղի է ունեցել այդ երկրների ԱԳ նախարարների նիստը: Նիստից առաջ առանձին հանդիպել են Թուրքիայի եւ Ադրբեջանի ԱԳ նախարարներ Ահմեդ Դավութօղլուն եւ Էլմար Մամեդյարովը: Նրանք մանրամասնորեն քննարկել են ԼՂ խնդրի կարգավորման գործընթացը, ինչպես նաեւ միջազգային եւ տարածաշրջանային խնդիրներ: Այնուհետեւ տեղի է ունեցել թյուրքալեզու երկրների ԱԳ նախարարների նիստը, որին բացի Դավութօղլուից եւ Մամեդյարովից, մասնակցել են Թուրքմենստանի արտաքին կապերի գծով փոխվարչապետ եւ ԱԳ նախարար Ռաշիդ Մերեդովը, Ղրղըզստանի ԱԳ նախարար Ռուսլան Կազակբաեւը եւ Ղազախստանի ԱԳ նախարար Կանատ Սաուդաբաեւը:
Բացելով նիստը, Դավութօղլուն ասել է, որ իրենք ներկա են պատմական գագաթաժողովի. ստեղծվում է թյուրքալեզու երկրների համագործակցության խորհրդի քարտուղարություն, որը կարեւոր ծրագրեր է իրականացնելու կրթության, մշակույթի եւ սոցիալական ոլորտներում: Նա նշել է, որ առաջիկա տարիներին թյուրքալեզու երկրները ավելի կուժեղանան, իսկ Թուրքիան պատրաստ է օգնել եղբայրական երկրներին բոլոր ասպարեզներում: