Երեւի աշխարհը փրկող գերհերոսների մասին ֆիլմերը խորը հետք են թողել Թուրքիայի եւ Ադրբեջանի առաջնորդների գիտակցության մեջ: «Բարձր մակարդակով ռազմավարական համագործակցության խորհրդի ստեղծման» համատեղ հռչակագրի ստորագրման արարողության ժամանակ, Թուրքիայի վարչապետ Ռեջեփ Թայիփ Էրդողանը հայտարարել է, թե Բաքուն եւ Ստամբուլը իրենց առջեւ խնդիր են դրել տարածաշրջանում ապահովել «խաղաղություն, կայունություն եւ բարեկեցություն» հանուն ապագա սերունդների: Թե ինչպե՞ս են նրանք իրականացնելու իրենց հեռուն գնացող ծրագրերը, Էրդողանը չի հստակեցրել:
«Այսօր մենք նվաճում ենք ցանկալի նպատակ-գագաթը` թուրք-ադրբեջանական համագործակցության մեջ, որը Ադրբեջանի լուսահոգի նախագահ Հեյդար Ալիեւը բնորոշել է որպես «մեկ ազգ, երկու պետություն» ձեւակերպմամբ: Մենք նոր էջ ենք գրում մեր պատմության մեջ: Հարգելի Ալիեւի իմաստուն խոսքերը նոր իմաստ են ստացել շնորհիվ «Բարձր մակարդակով ռազմավարական համագործակցության հռչակագրի», որը մենք հենց նոր ստորագրել ենք իմ հարգելի եղբայր Իլհամ Ալիեւի հետ: Թուրք եւ ադրբեջանցի ժողովուրդները խոսում են մեկ լեզվով, ունեն ընդհանուր պատմություն»,- ոգեւորված արտասանել է Էրդողանն ու շարունակել. «Թուրքիան եւ Ադրբեջանն իրենց առջեւ նպատակ են դրել մեկ աշխարհագրական տարածքում ապահովել խաղաղություն, կայունություն եւ բարեկցեցություն: Մեր կապերը հասել են կատարյալ մակարդակին քաղաքական եւ տնտեսական ոլորտներում` զարգացման արդյունքում»:
Մնում է միայն հետաքրքրվել թուրքական առաջնորդից, թե այդ առաքելության մեջ դեր հատկացվո՞ւմ է տարածաշրջանի այլ երկրներին, օրինակ՝ նույն Իրանին: Սակայն այդ պահին Էրդողանն այդ մասին չէր էլ մտածում, առավել կարեւոր էր գուրգուրել «փոքր եղբորը»:
