Հակառակորդի դիպուկահարի արձակված կրակոցից փետրվարի 11-ին մահացած հովիվը՝ 54-ամյա Հակոբ Համբարձումյանը, պատերազմի մասնակից է եղել: Այս մասին NEWS.am-ին հայտնեց ԼՂՀ Մարտունու շրջանի Վազգենաշեն գյուղի համայնքապետ Անդրանիկ Բաբայանը, որի համագյուղացին է զոհված քաղաքացին:
«Ազատամարտիկների միության անդամ, վետերան էր: 1995թ. ապրում էր Վազգենաշենում: Անասնապահությամբ էր զբաղվում, ոչխար էր պահում: Տարել է ոչխարներին արածացնելու, դիպուկահարը խփել է»,- ասաց գյուղապետը:
Հակոբ Համբարձումյանը Վազգենաշենում կնոջ հետ էր բնակվում, երկու դուստրերն ամուսնացած են:
Ավելի վաղ NEWS.am-ը հայտնել էր, որ փետրվարի 11-ին՝ ժամը 16:00-ի սահմանում, հակառակորդի կողմից «ԻՍՏԻԳԼԱԼ» տեսակի դիպուկահար հրացանից արձակված կրակոցից մահացու հրազենային վիրավորում է ստացել քաղաքացիական անձ, ԼՂՀ Մարտունու շրջանի Վազգենաշեն գյուղի բնակիչ, հովիվ, 1962թ. ծնված Հակոբ Համբարձումյանը: Դեպքի մանրամասները պարզելու համար կատարվում է քննություն: