Երեկ` սեպտեմբերի 16-ի երեկոյան Մոսկվայի կենտրոնում կրակել են հետխորհրդային տարածքում ամենազդեցիկ օրենքով գող Ասլան Ուսոյանի (Դեդ Հասան) վրա։ Քրեական հեղինակությունը փորին գնդակի հարված է ստացել իր մեքենայից դուրս գալիս։ Մայրաքաղաքի խուզարկուները համոզված են, որ հանցագործությունը կապված է Դեդ Հասանի եւ մեկ այլ օրենքով գող՝ Տարիել Օնիանիի քրեական կլանների հակասությունների հետ։ Անցած տարի այդ հակամարտության զոհ էր դարձել հայտնի Վյաչեսլավ Իվանկովը (Յապոնչիկ):
Ինչպես հայտնում է «Կոմերսանտ»-ը, 73-ամյա Ասլան Ուսոյանի վրա հարձակման ժամանակ քրեական հեղինակությունը մեծաթիվ թիկնապահների հետ դուրս է եկել մեքենայից եւ միանգամից փորին հրազենային վնասվածք ստացել։ Նրան տեղափոխել են հիվանդանոց։ Ավելի ուշ պարզվել է, որ Ասլան Ուսոյանը եւ նրա թիկնապահ Բաղրամյանը կենդանի են։
Վրաստանից եկած, ազգությամբ եզդի Ասլան Ուսոյանի եւ Տարիել Օնիանիի միջեւ 2008-ին ծագած լուրջ տարաձայնության պատճառ էր դարձել Իսպանիայում դատապարտված Զաքարիա Կալաշովի կայսրությունը կիսելու հարցը։ Այդ վեճում Դեդ Հասանին պաշտպանող Յապոնչիկը եւս վիրավորվել էր փորին ուղղված կրակոցից եւ մահացել։ Քրեական աշխարհում հարձակման պատասխանատվությունը դրել էին Տարիել Օնիանիի վրա։