ԲՀԿ կուսակցության ղեկավար, ԵԽԽՎ-ում Հայաստանի պատվիրակության անդամ Նաիրա Զոհրաբյանը մտավախություն չունի, որ իրեն կարող են զրկել ԵԽԽՎ-ում ձայնի իրավունքից:
«Ինձ բացարձակ չեն հետաքրքրում ԵԽԽՎ նախագահ Պեդրո Ագրամունդի մտադրությունները, բացարձակ մտավախություն չունեմ, որ դա կարող է իրագործվել եւ շարունակում եմ պնդել, որ ես ճիշտ եմ վարվել Մարգար Եսայանի հետ»,- NEWS.am-ի հետ զրույցում ասաց Նաիրա Զոհրաբյանը:
Վերջինս նշեց, որ չի ցանկանում այս գործընթացի վերաբերյալ հավելյալ մեկնաբանություններ տալ:
Նշենք, որ «Հայկական ժամանակ» թերթը՝ վկայակոչելով իր աղբյուրները` այսօր գրել է, որ ԵԽԽՎ-ում Թուրքիայի պատվիրակությունը բողոք է ներկայացրել ԵԽԽՎ Բյուրոյի հայաստանյան պատվիրակության անդամ Նաիրա Զոհրաբյանի պահվածքի հետ կապված:
Թուրքական կողմը բողոքել է, որ Զոհրաբյանը վիրավորել է Թուրքիայի մեջլիսի պատգամավոր Մարգար Եսայանին: Մեր տեղեկություններով, ԵԽԽՎ նախագահ Պեդրո Ագրամունդն ու ԵԽԽՎ-ում Թուրքիայի դեսպանն օրերս այդ հարցով զրույց են ունեցել ԵԽԽՎ-ում ՀՀ դեսպան Արմեն Պապիկյանի հետ:
Ըստ թերթի աղբյուրների` Ագրամունդը վճռական է տրամադրված, չի բացառվում, որ հարցը տեղափոխվի ԵԽԽՎ կանոնակարգային հանձնաժողով, եւ ԵԽԽՎ ապրիլյան նստաշրջանում Զոհրաբյանի դեմ պատժամիջոցներ կիրառվեն: Այս պահին քննարկվում է Զոհրաբյանին ձայնի իրավունքից զրկելու հարցը:
Մարգար Եսայանը, հիշեցնենք, ԵԽԽՎ ձմեռային նստաշրջանում «կողմ» էր քվեարկել բրիտանացի պատգամավոր Ռոբերտ Ուոլթերի «Բռնության աճը ԼՂ-ում եւ Ադրբեջանի մյուս գրավյալ տարածքներում» զեկույցին, որից հետո հենց դահլիճում նրան էր մոտեցել Նաիրա Զոհրաբյանը»: