ՄԻԵԴ-ում Դողու Փերինչեքի գործով Հայաստանի պահանջները լիովին բավարարվել են։ Այս մասին փետրվարի 22-ին ՀՀ խորհրդարանում ասել է ՄԻՊ թեկնածու Արման Թաթոյանը՝ պատասխանելով «Ժառանգություն» կուսակցության պատգամավոր Զարուհի Փոստանջյանի հարցին։ Նա հիշեցրել է, որ Հայաստանը Փերինչեքն ընդդեմ Շվեյցարիայի գործում ներգրավված էր որպես երրորդ կողմ եւ նրա բոլոր պահանջները բավարարվել են։
Հիշեցնենք, որ 2015թ. հոկտեմբերին ՄԻԵԴ-ը Թուրքիայի Աշխատավորական կուսակցության առաջնորդ Դողու Փերինչեքն ընդդեմ Շվեյցարիայի գործով դատական նիստում մերժեց Շվեյցարիայի հայցը, որի դատարանը Փերինչեքին դատապարտել էր Հայոց ցեղասպանությունը ժխտելու համար։ Այդուհանդերձ դատարանի նախորդ՝ 2008թ. վճռից հանվել էին Հայոց ցեղասպանությունը կասկածի տակ դնող գնահատականները։
