![](img/news/31/40/07/default.jpg)
Գյումրիում Ավետիսյանների սպանության մեջ մեղադրվող ռուս զինծառայող Վալերի Պերմյակովը ստել է՝ ասելով, թե դասալքության ընթացքում սնվել է տաքսիստի գնած շաուրմայով: Այս մասին NEWS.am-ի հետ զրույցում ասաց տուժողների իրավահաջորդների ներկայացուցիչ Լուսինե Սահակյանը՝ անդրադառնալով փետրվարի 26-ի դատական նիստին Հայաստանում Ռուսաստանի ԱԴԾ Սահմանային վարչության Գյումրիի սահմանապահ ջոկատի պետի տեղակալ Ալեքսանդր Կրուգլովի ցուցմունքին, որում վերջինը նշել է՝ «Հարցին, թե ինչով է սնվել, Պերմյակովը պատասխանեց, որ տաքսիստն իրեն շաուրմա է բերել եւ պեպսի կամ կոկա կոլա»:
«Դեռեւս նախաքննության ընթացքում է այդ վարկածը հերքվել, ինքն էլ ցուցմունք տալուց ասել է, որ դա սուտ է: Պերմյակովը այդ ժամանակ այդպես պատասխանել է, բայց սուտ է ասած եղել: Այդ ուղղությամբ քննություն է տարվել ու պարզվել է, որ ոչ մի տաքսիստ էլ չի եղել, եւ նույնիսկ ստել է, որ հեռախոսազանգով է շաուրմա պատվիրել, որովհետեւ նա ոչ մեկին չի զանգել»,-ասաց փաստաբանը:
Նշենք, որ Ալեքսանդր Կրուգովը Վալերի Պերմյակովին ձերբակալության վայրից հասցրել են սահմանապահ ջոկատ:
Հիշեցնենք, որ Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը 2015թ. դեկտեմբերի 18-ից սկսել է դատաքննությունը: Նիստերը տեղի են ունենում ռուսական ռազմաբազայի տարածքում: Դատարանի վճռով նիստն ընթանալու է ուրբաթ օրերին:
Վալերի Պերմյակովն իրեն մեղավոր է ճանաչել առաջադրված բոլոր մեղադրանքներում՝ առանձնակի դաժանությամբ իրականացված սպանություն, ավազակություն եւ Հայաստանի պետական սահմանը հատելու փորձ: