Երեւանում մեկնարկել է ընդդիմադիր 6 ուժերի համատեղ հավաք-երթը՝ ի հիշատակ 2008-ի մարտի 1-ի զոհերի:
Նշենք, որ նախապես համատեղ հավաք-երթի մասին հայտարարել էին ՀԱԿ-ը, «Նոր Հայաստանն» ու ՀԺԿ-ն, սակայն ավելի ուշ համատեղ հայտարարությամբ նրանց են միացել նաեւ Պարույր Հայրիկյանի ղեկավարած «Ազգային ինքնորոշում միավորումը», Աշոտ Մանուչարյանի «Հայաստան» նախաձեռնությունն ու «Քաղաքացիական պայմանագիր» կուսակցությունը, որի ղեկավար անդամ է ԱԺ պատգամավոր Նիկոլ Փաշինյանը:
Միասնական հավաք-երթի կարգախոսն է «Ընդդեմ պետական ահաբեկչության»: Երթը հսկում են ոստիկաններ, որոնք մեխակներ ունեն ձեռքներին:
Հիշեցնենք, որ 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում: Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին, իսկ նույն օրը երեկոյան իշխանությունները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան: Մինչ օրս 10 զոհերի համար ոչ ոք պատասխանատվություն չի կրել:
