ՀՀ պաշտպանության նախարար Սեյրան Օհանյանը վստահեցնում է, որ 2008թ. մարտի 1-ին բանակը ներքաղաքական նպատակներով չի օգտագործվել:
«Ընդունված որոշման համապատասխան բանակը միմիայն իրականացրել է կարեւորագույն օբյեկտների պաշտպանություն»,- այսօր՝ մարտի 1-ին, Գիտությունների ազգային ակադեմիայում գիտնականների հետ հանդիպումից հետո լրագրողների հետ զրույցում ասաց Սեյրան Օհանյանը:
Սեյրան Օհանյանը նշեց, որ կարծում է՝ մարտի 1-ի խնդիրները իրաբական դաշտում պետք է բարձրացնել:
Հիշեցնենք, որ 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում: Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին, իսկ նույն օրը երեկոյան իշխանությունները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան: Մինչ օրս 10 զոհերի համար ոչ ոք պատասխանատվություն չի կրել:
