Վանի Աղթամար կղզու Սուրբ Խաչ եկեղեցում քիչ առաջ ավարտվել է պատարագը: (ֆոտոռեպորտաժ)
Ինչպես փոխանցում է NEWS.am-ի հատուկ թղթակիցը, Պոլսո հայոց պատրիարքական փոխանորդ, արքեպիսկոպոս Արամ Աթեշյանը պատարագի վերջում ելույթ է ունեցել եւ եղբայրության ու հաշտության կոչեր է արել հայերի եւ թուրքերի միջեւ: Նա շնորհակալություն է հայտնել թուրքական իշխանություններին՝ տարվա մեջ մեկ անգամ պատարագ մատուցելու թույլտվություն տալու համար: Արամ Աթեշյանը ափսոսանք է հայտնել, որ պատարագին չի կարողացել մասնակցել պատրիարք Մեսրոպ Մութաֆյանը, ով առաջինն է Սուրբ Խաչի վերականգնման հարցը բարձրացրել թուրքական իշխանությունների մոտ:
Նշենք, որ մի խումբ հայ հավատացյալներ փայտե խաչեր են բարձրացրել ի նշան բողոքի՝ խաչը չտեղադրելու որոշման դեմ:
Պատարագի ընթացքում, ըստ NEWS.am-ի թղթակցի, որեւէ միջադեպ չի գրանցվել:
Նշենք, որ պատարագին մասնակցել է միայն Պոլսո Հայոց պատրիարքարանը: Հոգեւոր մյուս կենտրոնները` Մայր Աթոռ Սուրբ Էջմիածինը, Երուսաղեմի պատրիարքարանն ու Մեծի Տանն Կիլիկիո կաթողիկոսությունը հրաժարվել են մասնակցել միջոցառմանը: Պատճառը եկեղեցու գմբեթին խաչ չտեղադրելու հանգամանքն է: Հարկ է նշել, որ նույն պատճառով կրոնական արարողությանը հրաժարվել են մասնակցել նաեւ հայ քաղաքացիական հասարակության շատ ներկայացուցիչներ, չնայած նրանց Թուրքիայի վարչապետն անձամբ է հրավիրել պատարագին: Քաղաքացիական հասարակության ներկայացուցիչները հայտարարել են, որ քանի դեռ եկեղեցու գմբեթին խաչ չի տեղադրվել, եկեղեցին վերականգնված համարել չի կարելի:
