Զատկի տոնին ընդառաջ Երեւանում հավի կապույտ, կանաչ, վարդագույն, նարնջագույն եւ այլ գույնի ճտեր են հայտնվել: Վարդան Դավթյանն առաջինն է Հայաստանում, որ սկսել է զբաղվել հավի գունավոր ճտերի բուծմամբ:
NEWS.am-ի հետ զրույցում Վարդան Դավթյանն ասաց, որ հավի գունավոր ճուտիկների նկատմամբ հետաքրքրությունը մայրաքաղաքում բավականին մեծ է:
«Մոտ երկու շաբաթ է` ինչ սկսել եմ այս բիզնեսով զբաղվել, պահանջարկը դեռ այդքան էլ մեծ չի, բայց հետաքրքրություն կա: Հիմնականում նվերի համար են տանում, կամ երեխաներին ուրախացնելու»,- նշեց նա:
Հավի գունավոր ճտերը վաճառվում են 1500 դրամով: Վարդան Դավթյանի խոսքով`դրանք ներկվում են մինչեւ ձվից դուրս գալը, ինչը չի վտանգում ո'չ մարդկանց, ո´չ էլ հավի ճուտիկների կյանքը:
«Բնական ճանապարհով են ներկվում` դեռ ձվի մեջ, որպեսզի թռչունների փետուրները չվնասվեն: Մարդկանց համար էլ են անվտանգ, այսինքն`երեխան ազատ կարող է շոյել, ձեռք տալ դրանց»,- ասաց Վարդանը:
Բժշկական համալսարանին հարակից գետնանցումում արդեն իսկ վաճառվում են հավի վարդագույն, կանաչ, մանուշակագույն, երկնագույն, մոխրականաչավուն ճտեր, առաջիկայում Վարդանը պատրաստվում է ավելացնել ոչ միայն հավի ճտերի գույների տեսականին, այլ նաեւ գունավոր բադեր ստանալ: