ԱՄՆ Կոնգրեսի Ներկայացուցիչների պալատը 393 կողմ եւ 0 դեմ ձայնով միաձայն դատապարտել է «Իսլամական պետության» կողմից Մերձավոր Արեւելքում քրիստոնյաների, այդ թվում՝ հայերի, ասորիների, ազգային փոքրամասնությունների՝ եզդիների եւ այլ կրոնական փոքրամասնությունների դեմ հանցագործությունները՝ դրանք ցեղասպանություն որակելով եւ ընդունելով համար 75 բանաձեւը։ Այս մասին հայտնում է ԱՄՆ հայ դատի հանձնախումբը։
«Ամերիկահայերը ողջունում են այսօր ԱՄՆ Կոնգրեսի ներկայացուցիչների պալատի քվեարկությունը՝ որպես ԱՄՆ առաջնորդների կողմից հզոր ազդակ ցեղասպանություններին վերջ դնելու համար։ Այդ հարձակումներից շատերն իրականացրել են Մերձավոր Արեւելքում Անկարայի դաշնակիցները»,- ասել է Հայ դատի հանձնախմբի գործադիր տնօրեն Արամ Համբարյանը՝ նշելով, որ ամերիկացի առաջնորդները շատ երկար ժամանակ ցեղասպանության ճանաչումը, մասնավորապես Հայոց ցեղասպանության ճանաչումը դիտարկում էին որպես աշխարհաքաղաքական ապրանք, որը ենթակա է փոխանակման եւ սակարկության։
Նշենք, որ համար 75 բանաձեւը նախաձեռնել էին Ներկայացուցիչների պալատի անդամներ Ջեֆ Ֆորթենբերին եւ Աննա Էշոն։
