Մարտի 17-ին Եվրոպայի լիգայի 1/8 եզրափակչի շրջանակներում տեղի կունենան պատասխան հանդիպումները: «Բորուսիան» Լոնդոնում կհանդիպի «Տոտենհեմին», որին առաջին խաղում հաղթեց 3:0 հաշվով: Թե ինչ հնարավորություններ ունի Մխիթարյանի թիմը այս մրցաշարում, եւ ինչի հետ է կապված Մխիթարյանի խաղային վերելքը այս խաղաշրջանում NEWS.am-ի թղթակից Վերա Մարտիրոսյանի հետ զրույցում պատմել է «Матч ТВ» հեռուստաընկերության մեկնաբան, գերմանական ֆուտբոլի մասնագետ Սերգեյ Կրիվոխարչենկոն, ով մեկնաբանում էր «Բորուսիա» – «Տոտենհեմ» հանդիպումը:
Սերգեյ, վերջին անգամ, երբ զրուցում էինք մեկ տարի առաջ քննարկում էինք, թե ինչու Մխիթարյանի մոտ խաղաշրջանը չստացվեց: Այժմ ասեք, ինչի՞ հետ է կապված նրա խաղային վերելքը Դորտմունդում:
Ակնհայտ է, որ սա Մխիթարյանի լավագույն մրցաշրջանն է: Դա ապացուցում է վիճակագրությունը, եւ այն տեսանելի տպավորությունը, որ նա թողնում է: Հենրիխը դարձել է ավելի ազատ, վստահ է իրեն զգում: Երեւում է, որ Տուխելի հետ խոսակցությունը մրցաշրջանի սկզբին շատ է ազդել իր վրա:Բացի այդ մարզչի մարզումների ձեւը, ինչի մասին հաճախ խոսում է ֆուտբոլիստը: Այժմ Մխիթարյանը «Բորուսիայի» իսկական լիդերն է: Իրականում նա է թիմին առաջ տանում: Նա սկսել է ավելի վտանգավոր գործել հակառակորդի դարպասների մոտ, ավելի շատ գոլեր խփել եւ կատարել գոլային փոխանցումներ: Նա հաճախ գնդակը ստանում է դաշտի կենտրոնում եւ հասցնում այն մինչը տուգանային: Հենրիխի մոտ լավ է ստացվում 30 մետրի վրա փոխանցումներ՝ եզրից եզր, կամ էլ տուգանայինի կենտրոն: Այժմ տեսնում ենք, որ Մխիթարյանը դարձել է մի ֆուտբոլիստ, ով կարող է ամեն բան անել՝ լինի դա վերջին գոլային փոխանցումը, կամ գրոհի սկիզբ հանդիսացող առաջին փոխանցումը: Նա շատ արագավազ է: Այս պահին Բունդեսլիգայի ամենաարագ ֆուտբոլիստներից է: Նաեւ շատ լավ գնդակ է խլում անհատական պայքարում:
Ինչի՞ շնորհիվ այս ամենին հնարավոր եղավ հասնել:
Նա սկսեց ավելի լավ իրագործել իր հնարավորությունները: Դա Թոմաս Տուխելի աշխատանքի արդյունքն է: Ֆուտբոլիստն ինքը այդ մասին հաճախ ասում է: Ոչ միայն նա, այլ նաեւ ողջ թիմը նոր մարզչի հետ շատ է աճել: Մխիթարյանի մոտ այդ պոտենցիալն այնքան ուժեղ էր, որ երբ Տուխելն օգնեց իրեն, նա իր ընկերներից ավելի շատ առաջադիմեց: Տուխելը այնպիսի մարզիչ է, որը մանրակրկիտ հասկանում է թե թիմի, թե խաղացողների ուժեղ եւ թույլ կողմերը: Գարնանը, երբ պարզ դարձավ նրա նշանակման մասին, մարզիչը հանդիպեց ֆուտբոլիստների հետ եւ խոսեց: Մխիթարյանին նա շատ էր հավատում:
Երբ Յուրգեն Կլոպը հեռացավ «Բորուսիայից», հավատո՞ւմ էիք, որ Տուխելին կհաջողվի ուժեղացնել «Բորուսիան»:
Այո, ես այս մասին ասում էի: Պարզ էր, որ Կլոպի հետ բաժանումն այդքան ծանր չի լինի, ինչպես թվում էր: Նա համառում էր եւ նրա մոտ ստեղծագործական ճգնաժամ էր: Իսկ Տուխելը, ով մինչ այդ աշխատում էր «Մայնցում», հայտնի է նրանով, որ մանրակրկիտ ուսումնասիրում էր ամեն բան: Նրա թիմի խաղն առանձանում էր տակտիկապես ճկունությամբ: Չունենալով աստղեր, նրա թիմը խաղում էր շատ վառ՝ ստեղծելով խնդիրներ մրցակիցներին:
Ինչպե՞ս եք գնահատում «Բորուսիայի» հնարավորությունները Եվրոպայի Լիգայում:
Շատ բարձ՝ հաշվի առնելով, որ նրանք շատ են ցանկանում հաղթել այս մրցաշարում: «Տոտենհեմի» հետ պատասխան խաղը այդքան էլ հետաքրքրություն չի առաջացնում, բայց կան թիմեր, որոնք այս մրցաշարին շատ լուրջ են տրամադրված: «Լիվերպուլի» հետ բարդ կարող է լինել, քանի որ Կլոպի դեմ են խաղալու: «Բորուսիան» այս մրցաշարում ուժեղագույն թիմերից է, բայց «Սեւիլիան» ու «Վիլյառեալը» նույնպես բարդ մրցակիցներ են նրա համար:
Վերա Մարտիրոսյան / Vera&Football