Սյունիքի մարզի Անգեղակոթ գյուղի 25-ամյա բնակիչ Վրեժ Օհանյանի անհետացումից երկու ամսից ավելի է անցել, սակայն նրա գտնվելու վայրի մասին դեռեւս որեւէ տեղեկություն չկա:
NEWS.am-ի հետ զրույցում Անգեղակոթի գյուղապետ Արմեն Խաչատրյանը հայտնեց, որ որոնողական աշխատանքները շարունակվում են: Վրեժի հարազատները վստահ են` նա ողջ է:
«Շաբաթը երկու անգամ ոստիկաններ են գալիս, որոնում են գյուղով մեկ: Նրան մահացած գտնելու վարկածը չի քննարկվում դեռ: Հույսներս չենք կորցնում, փնտրում ենք»,-ասաց գյուղապետը:
Նշենք, որ Վրեժ Օհանյանը հունվարի 14-ից որոնվում է որպես անհետ կորած:
Ավելի վաղ NEWS.am-ի հետ զրույցում Անգեղակոթի գյուղապետը հայտնել էր, որ 25-ամյա երիտասարդը վերջերս է նշանադրվել, նրա հարսնացուն նույնպես տեղեկություն չունի նրա գտնվելու մասին: Գյուղապետի խոսքով՝ անհետ կորածի ընտանիքի հետ զրույցից պարզ է դարձել, որ տնից դուրս գալու օրը Վրեժը բարձր տրամադրություն է ունեցել, եւ, առհասարակ, էական խնդիրներ չի ունեցել: Ըստ գյուղում շրջանառվող մեկ այլ վարկածի, սակայն, երիտասարդը վիրավորվել է ընտանիքի անդամներից եւ հեռացել:
Նշենք, որ Վրեժ Օհանյանը պարբերաբար արտագնա աշխատանքի է մեկնում Ռուսաստան, աշխատում է որպես զոդող, եւ ամիսներ առաջ էր վերադարձել Հայաստան:
ՀՀ քննչական կոմիտեի Սյունիքի մարզային քննչական վարչությունում ՀՀ ՔՕ 104-րդ հոդվածի 1-ին մասով (սպանություն) հարուցված քրեական գործի շրջանակում նյութերի ուսումնասիրությամբ պարզվել է, որ երիտասարդը բնակատեղից մեկնելու կամ երկարատեւ բացակայելու մտադրությունը հարազատներից թաքցնելու պատճառներ չի ունեցել, իր մոտ չի ունեցել այնպիսի անձնական իրեր, առանց որոնց հնարավոր է երկարատեւ բացակայել բնակավայրից:
Կատարվում է նախաքննություն: Ձեռնարկվում են անհրաժեշտ քննչական գործողություններ՝ երիտասարդի կորելու հանգամանքները պարզելու ուղղությամբ: