Թուրք նախարարներին միլիոնավոր դոլարներով կաշառած եւ միլիարդավոր դոլարների հասնող մաքսանենգությամբ զբաղված եւ նախագահ Էրդողանի հովանավորությունը վայելող թուրք խոշոր գործարար Ռըզա Սարրաֆը (Ռեզա Զարրաբ) ձերբակալվել է ԱՄՆ-ում։
Թուրքական Cumhuriyet-ի փոխանցմամբ՝ Ռըզա Սարրաֆին ԱՄՆ-ում ձերբակալել են Իրանի հանդեպ պատժամիջոցները խախտելու, բանկային կեղծարարություն անելու եւ ԱՄՆ-ին թալանելու մեղադրանքով։
Նշենք, որ Ռեզա Զարրաբը Թուրքիայում ձերբակալվել էր 2013-ի դեկտեմբերի 17-ի «Մեծ կաշառք» գործողության ժամանակ։ Էրդողանի կողմից փոխված դատավորներն ու դատախազները ամեն ինչ արեցին «Մեծ կաշառք» գործով ձերբակալվածներին ազատ արձակելու համար եւ փետրվարի 28-ին արդեն բոլորը հայտնվել են ազատության մեջ։
Ռեզա Զարրաբը մեղադրվում է միլիոնավոր դոլարների մաքսանենգության եւ խոշոր չափերով կաշառքներ տալու մեջ։