Հայաստանում չպետք է պետական մակարդակով նշվի 2008թ. մարտի 1-ի ողբերգական դեպքերի զոհերի հիշատակը։ Այս մասին ասված է ՀԱԿ պատգամավորների ներկայացրած՝ «ՀՀ տոների եւ հիշատակի օրերի մասին» օրենքում փոփոխությունների նախագծի շուրջ ՀՀ Արդարադատության նախարարության եզրակացության մեջ։ Պատգամավորներն առաջարկում են մարտի 1-ը սահմանել որպես պետական ահաբեկչության եւ բռնաճնշումների դեմ համազգային բողոքի զոհերի հիշատակի օր։
Արդարադատության նախարարության կարծիքով, որը հնչեց մարտի 24-ին կայացած Կառավարության նիստում, նման ձեւակերպումը բովանդակային առումով չի համապատասխանում օրենքի դրույթներին։ Բացի այդ, օրինագիծը հիմնված է քաղաքական գնահատականների վրա։ Մասնավորապես պատգամավորները հիմնավորման մեջ նշում են, որ թեպետ ֆորմալ առումով քննությունը շարունակվում է, սակայն, ըստ էության, այն ավարտվել է, եւ գործնականում քննչական եւ օպերատոիվ որոնողական միջոցառումներ չեն իրականացվում։ Կառավարությունը մերժեց օրինագիծը։
Հիշեցնենք, որ 2008թ. մարտի 1-ին Երեւանի կենտրոնում իշխանության հետ բախումներից զոհվել է 8 ցուցարար եւ Ներքին զորքերի 2 ծառայող։ Սպանությունների համար ոչ ոք մինչեւ հիմա չի պատժվել։