Ներկայումս 125 զինվոր, որոնք վիրավորվել են ապրիլի 2-5 ռազմական գործողությունների հետեւանքով, բուժում են ստանում Հայաստանի եւ Լեռնային Ղարաբաղի բժշկական կենտրոններում: Նրանցից 5-ի վիճակը ծայրաստիճան ծանր է: Այդ մասին լրագրողներին հայտնել է ռազմական բժշկության վարչության պետի տեղակալ, փոխգնդապետ Հարություն Գալստյանը: (ֆոտոռեպորտաժ)
Նրա խոսքով, 45 վիրավոր այժմ գտնվում է Երեւանի կենտրոնական կլինիկական ռազմական հոսպիտալում, մնացածները կայազորային հոսպիտալներում եւ ՊԲ հոսպիտալում: Զինվորներից մեկը ծանր վիճակում է, հրազենային վնասվածք է ստացել ռազմական գործողությունների ակտիվ փուլից հետո: Զինվորների մեծամասնության մոտ բեկորային վերքեր են:
Ինչպես նշել է Հարություն Գալստյանը, բոլոր վիրավորների վիճակում դրական տեղաշարժ է նկատվում. «Հաղթած զինվորների մոտ վերքերն ավելի արագ են սպիանում»: Նրանք բոլորն անհրաժեշտ օգնություն են ստանում եւ առողջապահության եւ պաշտպանության նախարարության լավագույն մասնագետների մշտական վերահսկողության տակ են:
Կան նաեւ լիովին առողջացած եւ դուրս գրված զինվորներ, եւս մի քանիսին նախատեսում են դուրս գրել մոտ ապագայում, չնայած նրանցից որոշները կարող են ֆիզիկական կամ հոգեբանական վերականգնման կարիք ունենալ:
Հարություն Գալստյանը նաեւ նշել է, որ անհրաժեշտության դեպքում, եթե Հայաստանում վիրավոր զինվորներին անհնար լինի բուժօգնություն տրամադրել, կքննարկվի արտասահմանում նրանց բուժման կազմակերպման հարցը: