Ստամբուլում Իսլամական համագործակցության կազմակերպության՝ Ադրբեջանի եւ Թուրքիայի դրդմամբ ընդունված ամփոփիչ փաստաթղթում տեղ գտած ձեւակերպումներն ամբողջությամբ աղավաղում են Լեռնային Ղարաբաղի հակամարտության էությունը, որը արդյունք է Ադրբեջանի՝ Լեռնային Ղարաբաղի ժողովրդի ինքնորոշման իրավունքը ռազմական եղանակով ճշնելու քաղաքականության: Այդ մասին NEWS.am-ին հայտնել է ՀՀ ԱԳ փոխնախարար Շավարշ Քոչարյանը:
«Տվյալ ձեւակերպումներով մերժվում է ժողովուրդների ինքնորոշման իրավունքի նկատմամբ հարգանքը, որը հանդիսանում է նաեւ Իսլամական համագործակցության կազմակերպության նպատակներից մեկը եւ որի հիման վրա ձեւավորվել է այդ կազմակերպության անդամ պետությունների մեծամասնությունը:
Իրական ագրեսոր Ադրբեջանը ներկայացվում է որպես զոհ, ինչն նա համարելու է աջակցություն ագրեսիայի նոր ալիք ծավալելուն եւ Լեռնային Ղարաբաղի հակամարտությանը կրոնական երանգ հաղորդելու իր ջանքերին»,- նշել է փոխնախարարը:
Նրա խոսքով, տարակուսանք է առաջացնում, որ ինքնորոշված ժողովրդի դեմ ծայրահեղ ահաբեկչական կազմակերպությունների ձեռագրով պայքարող Ադրբեջանը եւ տարածաշրջանում անկայունության, ահաբեկչության եւ արյունահեղության ալիք տարածող Թուրքիան կարողացան իրենց՝ միջազգային եւ միջնորդ երկրների ջանքերին հակադիր, սադրիչ մոտեցումները հերթական անգամ ներառել Իսլամական համագործակցության կազմակերպության փաստաթղթում: