Թուրքիայի «Ազգայնական շարժում» կուսակցության ղեկավար Դեւլեթ Բահչելին որոշել է հոկտեմբերի 1-ից սկսվող խորհրդարանական աշխատանքները սկսել Անիի մայր տաճարում նամազ անելով։

Թուրքական Star-ի փոխանցմամբ՝  թուրք ազգայնականը այդ քայլն անում է ի հակադրություն Աղթամարի Ս. Խաչում տեղի ունեցած պատարագի։
Պատմությունից անտեղյակ  թուրք ազգայնական Դեւլեթ Բահչելիին թվում է, թե  1001 թվականին Անիում կառուցված հայկական եկեղեցին կառուցել է Ալփարսլանը, ով Անի է մուտք գործել միայն 1064 թվականին։  Ընդ որում, ներկայումս էլ Անիի մայր տաճարի դիմաց գտնվող ցուցանակի վրա  նույնիսկ թուրքերենով նշված է կառուցման տարեթիվը՝ 1001 թվական։  Դեւլեթ Բահչելիին թվում է, թե ինքը նամազ է անելու այսպես ասած Ֆեթիյե մզկիթում։

Նշենք, որ շատ մասնագետների կողմից Կովկասի ճարտարապետության զարդը համարվող Անիի մայր տաճարի շինարարությունն սկսվել է հայոց արքա Սմբատ 2-ի օրօք՝ 989 թվականին եւ ավարտվել Գագիկ 1-ինի օրօք՝ նրա կնոջ՝ Կատրամիդե թագուհու օժանդակությամբ 1001 թվականին։  Անիի մայր տաճարի ճարտարապետն էր Տրդատը, ով նաեւ վերակառուցել էր Կոստանդնոպոլսի Ս. Սոֆիա տաճարի գմբեթը։

Արթուր Հակոբյան