Լրջագույն աշխատանք է ընթանում ԵԽԽՎ-ին Ադրբեջանի կատարած ռազմական հանցագործությունների մասին իրազեկելու համար։ Այս մասին NEWS.am-ի թղթակցին ասել է ԵԽԽՎ-ում հայկական պատվիրակության անդամ, ԲՀԿ ղեկավար Նաիրա Զոհրաբյանը՝ անդրադառնալով ԵԽԽՎ անդամներին ադրբեջանական ագրեսիայի մասին տեղյակ պահելու գործունեությանը։

Զոհրաբյանի խոսքով՝ օրակարգից ղարաբաղյան հակամարտության թեման բացառելն առհասարակ չի ենթադրում քննարկումների բացակայություն։ «Արդեն եղել են Հերմինե Նաղդալյանի, Սամվել Ֆարմանյանի եւ իմ ելույթները։ Այսօր՝ մարդու իրավունքների հարցերով հանձնակատարի զեկույցի քննարկման ժամանակ, մենք կբարձրացնենք Ադրբեջանի կատարած հանցագործությունների հարցը։ Երեկոյան «Պանամական փաստաթղթերի» հարցով քննարկումներ կլինեն, որոնց մեջ ներքաշված է Ալիեւիների կլանը։ Այսինքն՝ յուրաքանչյուր առիթ օգտագործվելու է, որպեսզի բարձրացվի ադրբեջանական ագրեսիայի հարցը»,- նշել է Նաիրա Զոհրաբյանը։

Նրա խոսքով՝ հարցն օրակարգում ներառելը կսահմանափակեր հայկական պատվիրակության հնարավորությունները։ «Եթե հարցը ներառված լիներ, քննարկման թեմային կես ժամ կհատկացվեր, եւ մենք իրավունք չէինք ունենա բարձրացնել հարցը մյուս քննարկումների ժամանակ։ Իսկ այսպես մենք սահմանափակված չենք»,- նշել է պատգամավորը։

Նաիրա Զոհրաբյանը նաեւ նշել է, որ ԵԽԽՎ պատգամավորներին թռուցիկներ են բաժանել Ադրբեջանի կատարած ռազմական հանցագործությունների մասին։ «Լուսանկարներ չենք ընդգրկել էթիկայի նկատառումներից ելնելով»,- ասել է պատգամավորը։