ԵԽԽՎ-ում հայկական պատվիրակության անդամ Նաիրա Կարապետյանը հրապարակել է իր ելույթի տեքստը, որը ժամանակի սղության պատճառով չի հասցրել կարդալ ԵԽԽՎ ամբիոնից: NEWS.am-ի հետ զրույցում պատգամավորը նշեց, որ կանոնակարգի համաձայն, չընթերցված տեքստերն ուղարկվում են քարտուղարություն, դրանց հիման վրա կազմվում է արձանագրություն եւ կցվում փաստաթղթերին:
Իր ելույթում Նաիրա Կարապետյանը, մասնավորապես, դատապարտել է Ադրբեջանի կողմից խաղաղ բնակչության դեմ գործադրած ագրեսիան եւ ԵԽԽՎ ամբիոնից ներկայացրել զինվորականների խոշտանգումների եւ պատերազմական հանցագործությունների փաստերը։
Պատգամավորը հիշեցրել է, որ Ադրբեջանը, խախտելով ՄԱԿ կանոնակարգը, ծանր հրետանի է գործածել քաղաքացիական օբյեկտների դեմ՝ օգտագործելով կասետային սպառազինություն։ Կարապետյանն իր ելույթում նաեւ նշել է, որ Ադրբեջանի օգտագործած «Գրադ» կայանքի կրակից դպրոցի բակում զոհվել է 12-ամյա դպրոցական Վաղինակ Գրիգորյանը, եւս երկու երեխա վիրավորվել են։
Նրա խոսքով, դա Ադրբեջանի կողմից քառօրյա պատերազմի ժամանակ քաղաքացիական բնակչության դեմ բռնության միակ դեպքը չէ։ «Թալիշ գյուղում ադրբեջանցի զինվորները սպանել էին երեք տարեց բնակիչների եւ կտրել նրանց ականջները։ Ադրբեջանցի զինվորականները գլխատել են Լեռնային Ղարաբաղի Պաշտպանության բանակի զինծառայողներ Քյարամ Սլոյանին, Հայկ Թորոյանին, Հրանտ Գաբրիելյանին։ Այդ մասին են վկայում սոցիալական ցանցերում բազմաթիվ լուսանկարները։ Ադրբեջանցի զինվորականները «հաղթական ավարի» պես լուսանկարվել էին Քյարամ Սլոյանի գլխի հետ»,-նշել է իր ելույթում Նաիրա Կարապետյանը։
Հայ պատգամավորի խոսքով՝ հայ զինվորի գլուխը հայության խորհրդանիշն էր, եւ դրա անարգանքը վկայում է հայերի նկատմամբ ատելության եւ ագրեսիայի մասին։ «Բաքվի կողմից մեղավորներին պատժելու ոչ մի քայլ չի ձեռնարկվել»,- հիշեցրել է Կարապետյանը եւ հավելել, որ պատերազմական հանցագործության մեկ այլ դրվագ է Լեռնային Ղարաբաղին հանձնված ՊԲ 18 զինվորների մարմինների խոշտանգման եւ անդամահատման փաստը։
«Հարգելի՛ գործընկերներ, Ադրբեջանն իրեն կրակի երկիր է անվանում, եւ դա ոչ թե կյանքի, խաղաղության եւ ժողովրդավարության կրակ է, այլ պատերազմի, սարսափի եւ մահվան կրակ։ Ես խստորեն դատապարտում եմ Լեռնային Ղարաբաղի դեմ Ադրբեջանի սանձազերծած ագրեսիան։ Ադրբեջանի զինուժը Լեռնային Ղարաբաղի զորքերի դեմ ահաբեկչական ակտեր են կատարել, որոնք բնորոշվում են որպես ռազմական հանցագործություն։ Նախագահ Ալիեւը շարունակում է անտեսել տարածաշրջանում կայուն խաղաղություն հաստատելու միջազգային ուղերձները։ Ալիեւի քաղաքականության իրական զոհը Արցախի ժողովուրդն է, որն ուղղակի ուզում է ազատ ապրել մի երկրում, որտեղ մարդու իրավունքներն ու ժողովրդավարությունը իրական արժեքներ են։ Սա տարածքների խնդիր չէ, այլ ազգերի ինքնորոշման միջազգային իրավունքի իրականացում»,- ասել է Նաիրա Կարապետյանը։
