Ադրբեջանի զինված ուժերն օգտագործել են մահաբեր հարձակողական զենքեր, որոնք ձեռք են բերվել վերջին 20 տարիներին՝ միջազգային նորմերի կոպիտ խախտումով: Այդ մասին ԵԽԽՎ-ում հայտարարել է Հայաստանի ԱԺ պատգամավոր, ԵԽԽՎ-ում հայաստանյան պատվիրակության անդամ Սամվել Ֆարմանյանը՝ կոչ անելով դատապարտել Ադրբեջանի կողմից միջազգային մարդասիրական իրավունքի խախտումների փաստերը։
Նա կոչ է արել ԵԽԽՎ-ին եւ միջազգային կառույցներին սթափվել։ Ֆարմանյանը նշել է, որ ուժի կիրառումը հակասում է միջազգային օրենքին, ավելին, նկատել է, որ Ադրբեջանի բանակի թիրախում են եղել նաեւ քաղաքացիական ենթակառուցվածքները եւ խաղաղ բնակչությունը: Որպես փաստեր պատգամավորը նշել է 12-ամյա երեխայի սպանությունը, Թալիշում երեք տարեցների դաժան սպանությունը, հայ զինվորների դիակների անարգանքը։
Սամվել Ֆարմանյանը հայտարարել է, որ Ադրբեջանի իշխանությունները եւ այն անձինք, ովքեր պատերազմական հանցագործություններ են իրականացրել, պետք է պատասխան տան միջազգային օրենքը խախտելու եւ պատերազմական հանցագործությունների համար: