Շատ եմ կարոտել ֆուտբոլը, ամեն բան կանեմ, որ շուտ ապաքինվեմ: Այս մասին NEWS.am-ի թղթակից Վերա Մարտիրոսյանի հետ զրույցում նշեց Հայաստանի ազգային հավաքականի եւ ռուսական «ԲՄԱ Էներգայի» հարձակվող Ռուսլան Կորյանը, ով այս տարվա փետրվարին կոճի կապանների ծանր վնասվածք էր ստացել եւ վերջին ամիսներին ապաքինվում էր:
«Արդեն մեկ ամիս է Մոսկվայում եմ: Վերջին երեք շաբաթը վերականգնողական էին: Առաջին շաբաթը բուժումներ էի ստանում: Հետո արդեն համատեղում էի բուժումը անհատական մարզումների հետ՝ օրեկան երեք ժամ: Մնաց երկու օր եւ կմեկնեմ թիմ, որպեսզի այնտեղ պարապեմ եւ մարզավիճակ ձեռք բերեմ»,-ասաց նա:
Ֆուտբոլիստի խոսքով, սկզբում կսկսի անհատական մարզումների ծրագրից: «Վերջին հետազոտությունները ցույց տվեցին, որ կապաններս լիովին վերականգնվել են: Ես շատ եմ կարոտում ֆուտբոլը: Ամեն բան կանեմ, որպեսզի շուտ ապաքինվեմ: Մինչ Հայաստանի հավաքականի մայիսյան խաղերը դեռ բավական ժամանակ կա: Կանեմ ամեն ինչ, որպեսզի պատրաստ լինեմ: Հուսամ, կհասցնեմ»,-ասաց Կորյանը::
