Հայկական պատվիրակության անդամները հրապարակավ քննադատել են ԵԽԽՎ նախագահ Պեդրո Ագրամունտին ապրիլյան իրադարձությունների ժամանակ ցուցաբերած ադրբեջանամետ դիրքորոշման համար։ Այս մասին ապրիլի 26-ին ԱԺ-ում ասել է ԵԽԽՎ-ում հայկական պատվիրակության ղեկավար Հերմինե Նաղդալյանը։
«Մենք հիմա իհարկե չենք կարող վերադաստիարակել 70-ամյա ծերուկին եւ փոխենք նրա կարծիքը։ Նա հայտնի քաղաքական գործիչ է հարուստ կենսագրությամբ։ Բայց մեր պահանջը այլ է եղել։ Մենք նրան ասել ենք. երբ Դուք պատգամավոր էիք, կարող էիք ազատ ձեր կարծիքն արտահայտել։ Հիմա Ձեր խոսքը Եվրոպայի խորհրդի 47 երկրի հավաքական կարծիքն է արտահայտում»,- նշել է Նաղդալյանը։
Նրա խոսքով՝ Ագրամունտը չի պատասխանել հայկական կողմի քննադատությանը եւ հակափաստարկներ չի բերել։ «ԵԽԽՎ մյուս պատվիրակներին մանրամասն տեղեկություն է տրամադրվել այն մասին, թե նրա նկատմամբ ինչ հավակնություններ ունի հայկական կողմը»,- հավելել է Նաղդալյանը։
