KABC TV ամերիկյան ընկերության գլխավոր մենեջեր եւ նախագահը նամակ է գրել ամերիկահայերի Asbarez թերթին, որում հաստատել է, որ ընկերության օպերատորը, որը վիրավորել էր հայերին, այլեւս չի աշխատելու ընկերությունում։
Շերլի Ֆեյերը ներողություն է խնդրել տեսանյութի համար եւ նշել, որ այդ օպերատորն աշխատում էր հրավիրված աշխատակցի կարգավիճակով եւ հետագայում նրան գործի չեն վերցնելու։
Նշենք, որ Ամերիկայի թուրքերի ասամբլեայի նախկին նախագահ Նուր Հոսթեթլերի հետ հարցազրույցը նկարահանած օպերատորը հայերին անվանել էր «ապուշներ» եւ «ավազակներ»։
Միաժամանակ նամակում ասվում է, որ Ցեղասպանության մոլի ժխտող Հոսթեթլերի մասնակցությամբ սյուժեն «ազնիվ եւ ճիշտ» է եղել, ինչն առաջ է բերել հայկական կազմակերպությունների քննադատությունը, որոնք նշել են, որ Հայոց ցեղասպանությունը ժխտող գործչի հետ հարցազրույցը դժվար թե իրադարձությունների «ազնիվ» լուսաբանում կոչվի։ Հայերը ընկերության ղեկավարությանը կոչ են արել համապատասխան միջոցներ ձեռնարկել։
