Վերջին օրերին արտասահմանյան մամուլում անընդհատ լուրեր են տարածվում, թե Հայաստանի ազգային հավաքականի ավագ Հենրիխ Մխիթարյանը այս ամռանը կարող է լքել «Բորուսիան»:
Ամենից շատ քննարկվում են անգլիական «Արսենալի», «Չելսիի» եւ իտալական «Յուվենթուսի» անունները: Վերջինիս հետ սերտ համագործակցության մեջ է ֆուտբոլիստի գործակալ Մինո Ռայոլան:
«Բորուսիայի» գործադիր տնօրեն Հանս-Յոախիմ Վացկեն օրերս նշել է, որ չի կարծում, թե ակումբը կկարողանա երկարաձգել պայմանագիրը Մխիթարյանի հետ, սակայն, ըստ նրա, հայ ֆուտբոլիստը եկող մրցաշրջանը դեռ կանցկացնի Դորտմունդում:
NEWS.am-ի թղթակից Վերա Մարտիրոսյանի հետ զրույցում գերմանացի հայտնի լրագրող Ուլի Հեսեն ասաց, որ Դորտմունդում վերջերս նույնպես անընդհատ խոսում են Մխիթարյանի հեռանալու մասին, սակայն, ըստ նրա, դրանք ընդամենը խոսակցություններ են եւ Մխիթարյանը եկող մրցաշրջանում նույնպես կմնա Դորտմունդում, քանի որ նրան այնտեղ ամեն բան դուր է գալիս:
Հիշեցնենք, որ Հենրիխ Մխիթարյանի պայմանագիրը Դորտմունդի «Բորուսիայի» հետ նախատեսված է մինչեւ 2017 թվականը: Այս ամռանը թիմից կհեռանան Բորուսիայի ավագ Մատս Հումելսն ու հնարավոր է նաեւ Իլկայ Գյունդոգանը:
