Այսօր ղարաբաղա-ադրբեջանական զորքերի շփման գծում ստեղծված իրավիճակը բոլորովին նման չի ապրիլի սկզբի իրավիճակին, Ադրբեջանի զինուժի բավականին ավելի մեծ զորքերի շարժի մասին է խոսքը: Այս մասին այսօր՝ մայիսի 3-ին, լրագրողների հետ հանդիպման ժամանակ նշել է ՀՀ պաշտպանության նախարարի մամուլի քարտուղար Արծրուն Հովհաննիսյանը՝ անդրադառնալով հարցին, թե ինչ քանակի զորքեր են մոտեցվել ԼՂՀ սահմանին եւ սա որքանով է նման պատերազմական վիճակին:
«Հետախուզությունը ամեն ինչ տեսնում, լսում է: Եթե դա չլիներ, համապատասխան հայտարարություններ չէին լինի: Քանակի մասին չեմ կարող ասել օբյեկտիվ պատճառներով»,-ասաց նա՝ հավելելով, որ Ադրբեջանի զորքերի տեղաշարժը, կուտակումների փոփոխությունները մշտական են, անցած օրերի ընթացքում հակառակորդը դա շարունակում է, շեշտակի փոփոխություններ չկան:
«Երեկ իրենք էլ Ադրբեջանի ՊՆ-ն չժխտող սուր հայտարարություն արեց, որ իրենց զորքերը կուտակումներ, խոանավումներ իրականացնում է»,-ընդգծեց Հովհաննիսյանը:
Հարցին՝ ունե՞ք տեղեկատվություն հարձակման վերաբերյալ, Արծրուն Հովհաննիսյանը պատասխանեց. «Կարծում եմ՝ այս պահին դժվար է ասել՝ ինչ կլինի, երբ կլինի. դա հնարավոր չէ: Կարեւորն այն է, որ պաշտպանության բանակն իր բոլոր հետախուզական միջոցներով այս ամենը ֆիքսում է, ոչինչ աննկատ չէ, հակառակորդի գործողությունները մեզ համար տեսանելի են»:
ՊՆ խոսնակի խոսքով, ակտիվ մարտական գործողությունների փուլից հետո ԼՂՀ պաշտպանության բանակի ստորաբաժանումները համապատասխան աստիճանի են բերվել ու անակնկալության գործոնը նվազեցվել է: «Պատերազմների պատմության մեջ ոչ մեկ չի կարող բացառել, որ դիմացի գործողությունները քեզ համար ինչ-որ առումով անակնկալության տարրեր չեն ունենա՝ նորությունների, խուսանավումների հաշվին: Դա գիտություն է: Ամբողջ դիմացինի գործողությունները տեղը, ժամը, բնույթն իմանալու համար հակառակորդիդ ամբողջ փաստաթղթերը պետք է ձեռքիդ տակ լինեն»,- նշեց նա՝ հավելելով, որ պետք չէ անընդհատ շեշտադրել, թե հետախուզությունը թերացել է: «Քառօրյա պատերազմի օրերին տեղի են ունեցել այնպիսի քայլեր, մարտական դրվագներ, որ հետախուզության շնորհիվ է եղել եւ կանխարգելիչ այնպիսի հարվածներ են հասցվել, որ մարտական գործողությունները կարող էին այլկերպ, այլ ընթացք ստանալ, այլ ծավալների ու ժամկետների մեջ, եթե չլինեին հետախուզության տվյալները»,-ասաց նա: