Թուրքական մամուլում լայն տարածում է գտել տեղեկատվությունն այն մասին, որ «Ազգայնական շարժում» կուսակցության ղեկավար Դեվլեթ Բահչելին հայկական ծագում ունի եւ նրա նախնիները եղել են կրոնափոխ եղած հայեր։ Սեպտեմբերի 29-ին լրագրողների հետ հանդիպմանն այս մասին ասաց թուրքագետ ԵՊՀ արեւելագիտության ֆակուլտետի դեկանի տեղակալ Ռուբեն Մելքոնյանը: Հիշեցնենք, որ օրերս Բահչելին հայտարարել էր, որ պատրաստվում է իր կուսակիցների հետ Անիի մայր տաճարում զանգվածային նամազ կազմակերպել` ի պատասխան Աղթամարի Սուրբ Խաչում տեղի ունեցած պատարագի:
«Թուրքական հասարակությունում տիրող հակահայկական, հակաքրիստոնեական տրամադրություններն իրենց արտացոլանքն են գտնում նաեւ ներքաղաքական օրակարգում եւ Աղթամարի Սուրբ Խաչ եկեղեցում մատուցված պատարագն ընդդիմությունը փորձում է օգտագործել իշխող կուսակցության դեմ»,- նշեց Ռուբեն Մելքոնյանը:
«Այն հանգամանքը, որ ընդդիմադիր «Ազգայնական շարժումը» փորձում է շահարկել այս հարցը, ցույց է տալիս, որ թուրքական հասարակության մեջ մեծ մասը ոչ հանդուրժողական տրամադրություն ունի քրիստոնյաների եւ հայերի նկատմամբ։ Անիի Մայր տաճարում նամազ անցկացնելու նրա պատասխան քայլը մեծ խանդավառություն է առաջացրել հասարակության մոտ եւ դրանով Բահչելին փորձում է ավելացնել իր կուսակցության վարկանիշը»,-ասաց Ռուբեն Մելքոնյանն ու հավելել. «Միգուցե նրա մոտ ցանկություն է առաջացել նախնիների տաճարում աղոթելու։ Եւ նրան պետք է հարցնել, թե իր աղոթքում ի վերջո ո՞ւմ է դիմելու։ Կարող ենք մաղթել, որ աղոթքով հտակեցնի իր ինքնությունը եւ իր համար պարզի, թե ո՞վ է նա իրականում»: