Այս օրերին հայ-ադրբեջանական սահմանի Նախիջեւանի հատվածում հակառակորդը զինտեխնիկա է կուտակել: Այս մասին, այսօր՝ մայիսի 6-ին, ԱԺ-ում լրագրողների հետ զրույցում ասել է ԱԺ Պաշտպանության, ազգային անվտանգության եւ ներքին գործերի մշտական հանձնաժողովի նախագահ Կորյուն Նահապետյանը՝ հավելելով, որ իրավիճակը վերահսկելի է:
«Իրավիճակը վերահսկելի է: Եվ պաշտպանության նախարարության ղեկավարությունը, եւ Զինված ուժերի գլխավոր շտաբը տիրապետում են ամբողջապես իրավիճակին: Մեր զորախմբերը, Զինված ուժերի համապատասխան ստորաբաժանումներն ամբողջապես պատրաստ են ցանկացած հարձակում դիմագրավել, եւ այդ առումով ուզում եմ վստահեցնել նաեւ հանրությանը, որ մեր զինված ուժերի մարտունակության մակարդակը շատ բարձր է, եւ բոլոր այն նոր մարտահրավերներն ու սպառնալիքները, որոնք կարող են առաջ գալ կոնկրետ նաեւ ձեր նշած ուղղությամբ, ուղղակի պետք է հանգիստ լինենք, որովհետեւ իրապես մենք վերահսկում ենք կոնկրետ համապատասխան տարածքում»,- ասաց Կորյուն Նահապետյանը:
Ինչ վերաբերում է օրեր առաջ ԱԺ-ում պաշտպանության նախարար Սեյրան Օհանյանի եւ պատգամավորների հանդիպմանը, նա նշեց, որ հանդիպմանն անդրադարձ է եղել բազմաթիվ խնդիրների, սակայն հաշվի առնելով հանդիպման փակ լինելը, ինքը չի կարող մանրամասներ հրապարակել: «Ցավով պետք է արձանագրեմ, որ այդ դռնփակ հանդիպման առանձին նյութեր հրապարկվել են, եւ այդ առումով ինձ համար ուղղակի անհասկանալի է մեր որոշ գործընկերների պահվածքը, երբ հայտարարվում է, որ քննարկումը փակ է եւ առանձին գործընկերներ հրապարակել են որոշակի տեղեկություններ, որի իրավունքը, բնականաբար, չունեին»,-նշեց նա` հրաժարվելով անուններ նշել:
