Ճապոնական Toshiba ընկերության ղեկավար Մասաշի Մուրոմաչին (Masashi Muromachi) կլքի ընկերությունը նրա վերակազմավորման ծրագրի շրջանակում, ասված է Toshiba-ի հաղորդագրության մեջ:
«Որոշումը կայացվել է այն հիման վրա, որ բիզնեսի վերակազմավորման մի շարք նախաձեռնություններ արդեն իրականացվում են եւ ընկերությունը պիտի առաջ շարժվի եւ կենտրոնանա կառավարման նոր խմբի հետ աճի վրա», — ասված է հաղորդագրությունում, հայտնում է «ՌԻԱ Նովոստին»:
Ընկերության գործադիր փոխտնօրեն Սատոշի Տսունակավան այս տարվա հունիսից կփոխարինի Մուրոմաչիին տվյալ պաշտոնում: Ինքը` Մուրոմաչին կդառնա Toshiba-ի գործադիր խորհրդատուն:
Ավելի վաղ Toshiba-ն սկանդալի կենտրոնում էր հայտնվել այն բանի հետ կապված, որ ընկերությունը հաշվետվություններում մեծացնում էր եկամտի տվյալները եւ վեց տարի շարունակ բանկային հաշիվներից փող էր դուրս գրում: Սխալներ նկատելով` ընկերությունը մի քանի անգամ հետաձգել է 2014-15 ֆինանսական տարվա հաշվետվության ներկայացումը, որը վերջապես հրապարակվել է սեպտեմբերի 7-ին: Դրանում 37,8 մլրդ իենի (318 մլն դոլար) մաքուր վնաս էր արձանագրվել մեկ տարի առաջվա 60,2 մլրդ իեն (505,7 մլն դոլար) եկամտի փոխարեն:
Սկանդալն ի թիվս այլ բաների հանգեցրել է ընկերության երեք նախագահի փոփոխության: Արդյունքում Մուրոմաչին, որը տնօրենների խորհրդի նախագահն էր, նշանակվել էր ընկերության ղեկավարի պաշտոնում: Նա մի շարք քայլեր է ձեռք առել ընկերության վերակազմավորման համար: Այսպես, Toshiba-ն արդեն հազար աշխատատեղ է կրճատել եւ Sony Corp. ընկերությանն է վաճառել իր կիսահաղորդիչների ստորաբաժանման մի մասը, ամբողջ բժշկական բիզնեսը վաճառել է Canon Inc. ընկերությանը եւ սպառողական բաժնի մեծ մասը` չինական Midea Group Co-ին:
Toshiba Corporation-ը Ճապոնիայում համակարգչային օպերատիվ հիշողության խոշորագույն արտադրողն է: Ընկերությունը հիմնադրվել է Տոկիոյում` 1875-ին, մասնագիտացած է գերճշգրիտ էլեկտրոնիկայի եւ էլեկտրատեխնիկայի` ինտեգրալ համակարգերի, արդյունաբերական համակարգիչների, բջջային հեռախոսների, LCD-հեռուստացույցների, վերելակների արտադրության մեջ: