ՀՀ ֆինանսների նախարար Գագիկ Խաչատրյանը կարծում է՝ կոռեկտ չէ այս պահին քննարկել հարցը, որ պաշտոնյաներն ունեն մեծ ունեցվածք, իսկ սահմանին զոհվում են հիմնականում սոցիալապես անապահով խավի երեխաները:
«Իհարկե, պատերազմական շրջանում ավելի ցայտուն են ի հայտ գալիս սոցիալական բեւեռվածության խնդիրները: Եթե մենք գնում ենք նորմալ հարաբերությունների, միշտ կարելի է գտնել նման համեմատություններ, որոնք իրականության մեջ մահադրելի չեն: Նման թեմաներ հիմա շոշափելը կոռեկտ չի: Ի՞նչ ենք ուզում անել, սոցիալական հավասարությո՞ւն ստեղծենք: Ստեղծենք, ոչ թե հիմա, այլ տարիների ընթացքում, դրանք տարիներով են ձեւավորվում»:
Նրա խոսքով, ցանկացած մարդ, եթե կարող է, պետք է իր օժանդակությունը ցուցաբերի բանակին, նաեւ կառավարությունը:
«Իմ որդիները միշտ առաջնագծում են, հիմա էլ էնտեղ են, լուրջ ծրագրեր են իրականացնում, որոնց մասին, ցավոք, չեմ կարող ասել: Եթե կարողանամ ասել, դուք ուղղակի կզարմանաք»,-ասաց Գագիկ Խաչատրյանը:
Լրագրողի հարցին՝ ի՞նչ սոցիալական արդարության մասին է խոսքը, եթե իր եւ իր կնոջ ունեցվածքը միլիոնավոր դոլարներով են չափում, նախարարը պատասխանեց. «Եթե տենց համեմատության մեջ դնենք, ձեր մեջ էլ կարող է լինել տարբերություն, որ մեկը մյուսից ֆինանսապես ավելի լավ վիճակում է: Ես միշտ ասել եմ, որ պետք է վախենալ ոչ թե հայտարարագրված, այլ չհայտարարագրված գումարներից: Եթե ես հայտարարագրել եմ, գիտեմ՝ ինչ եմ հայտարարագրել»:
Հարցին՝ ինչպե՞ս եղավ, որ այդքան գումար կարողացավ կուտակել նախարար լինելով, Գագիկ Խաչատրյանը պատասխանեց, որ դա երկար տարիների աշխատանքի արդյունք է:
Նա նաեւ վստահեցրեց, որ, ինքն էլ, մյուս պաշտոնյաներն էլ, օգնություն ցուցաբերել են Ղարաբաղին: «Ես ինքս էլ օժանդակել եմ, բայց դա հրապարակման ենթակա չէ: Այն ծրագրերը, որոնք մենք ենք իրականացնում, հրապարակման ենթակա չեն»,- ասաց նա:
