Վախի հարց չկա, մենք որեւէ բանից չենք վախենում: Այս մասին, այսօր՝ մայիսի 9-ին, Հաղթանակի այգում լրագրողների հետ զրույցում նշել է Հայաստանի ԱԳ նախարար Էդվարդ Նալբանդյանը՝ անդրադառնալով Հայաստանի կողմից ԼՂՀ անկախության ճանաչման հարցին:
Նրա խոսքով, հարցն այն է, որ երկու պատգամավորերի կողմից ԼՂՀ անկախության ճանաչման վերաբերյալ նախաձեռնությանը կառավարության կողմից ձեւակերպման մեջ ասված է, որ դա կախված կլինի բանակցություններից, ՀՀ եւ ԼՂՀ միջեւ եւ նաեւ միջազգային հարթակում տեղի ունեցող զարգացումներից:
«Պետք է նկատի ունենանք, որ դրանք բավական նուրբ հարցեր են եւ այդպիսի հանկարծակի էմոցիոնալ քայլերով չի որոշվում»,-ասաց նա:
Հարցին, թե ինչի՞ց է վախենում Հայաստանի իշխանությունը, Նալբանդյանն արձագանքեց. «Վախի հարց չկա, մենք որեւէ բանից չենք վախենում: Դա ցույց է տալիս նաեւ, որ միջազգային հանրությունը կիսում է մեր կարծիքը եւ մեր դիրքորոշումը համահունչ է միջազգային հանրության դիրքորոշմանը: Դրա մասին են խոսում եռանախագահող երկրների նախագահների 5 հայտարարությունները: Դուք գիտեք, որ մինչ այսօր Ադրբեջանը խուսափում է հղում կատարել այդ 5 հայտարարություններին, իսկ դրանք միջազգային հանրության դիրքորոշումներն են ԼՂ խնդրի կարգավորման վերաբերյալ: Նաեւ կհիշեցնեմ, թե ԱՄՆ-ից, թե Ֆրանսիայից, թե ՌԴ-ից հստակ հնչեց, որ բանակցությունների գլխավոր հարցը ԼՂ ինքնորոշման նաեւ հարցն է, եւ այդ խնդիրը միշտ գտնվում է բանակցությունների կենտրոնում, եւ այդ բանակցությունների արդյունքում, իհարկե, պետք է ամեն ինչ անել, որ ապահովվի ԼՂ ինքնորոշման իրավունքի թե ճանաչումը, թե իրացումը»:
