Երեւանի Իսակովի պողոտայում մայիսի 10-ին, ժամը 00.12-ի սահմանում տեղի ունեցած ավտովթարի հետեւանքով Երեւանի «Աստղիկ» բժշկական կենտրոն տեղափոխված երկու երիտասադրները գտնվում են Վերակենդանացման բաժանմունքում: Հիվանդանոցից NEWS.am-ին տեղեկացրին, որ երիտասադներին վիրահատել են, այս պահին նրանց վիճակը բավարար է:
Ավելի վաղ տեղեկացրել էինք, որ Հայաստանի ԱԻՆ-ում մայիսի 10-ին, ժամը 00.12-ին ահազանգ է ստացվել, որ Երեւանի Իսակովի պողոտայում՝ «Մուլտի Լիոն» գազալցակայանի մոտ, տեղի է ունեցել ավտովթար, կան տուժածներ. անհրաժեշտ է փրկարարների օգնությունը:
Դեպքի վայր է մեկնել մեկ մարտական հաշվարկ, ՃԿԱԿ օպերատիվ խումբը եւ ՀՆՓԱԻ կենտրոնի փրկարարական ջոկատը:
Պարզվել է, որ բախվել են «Volkswagen Bora» մակնիշի 34 NL 167 (վարորդ՝ 33-ամյա Ռ. Խ.) եւ «Mercedes G500» մակնիշի 61 GG 661 համարանիշների ավտոմեքենաները, ինչի հետեւանքով վերջինս դուրս է եկել ճանապարհի երթեւեկելի մասից եւ բախվել ծառին:
Մինչ փրկարարների կանչի վայր հասնելը՝ ուղեւորներ` 28-ամյա Հ. Խ.-ն, 28-ամյա Մ. Բ.-ն եւ 29-ամյա Ա. Բ.-ն տեղի ուժերով դուրս են բերվել ավտոմեքենայից եւ հոսպիտալացվել «Աստղիկ» ԲԿ:
Փրկարարներն ավտոմեքենայից դուրս են բերել «Mercedes G500»-ի վարորդին, որը հոսպիտալացվել է «Աստղիկ» ԲԿ, որտեղ ժամը 01.10-ին մահացել է: Փրկարարներն ավտոմեքենայից դուրս են բերել նաեւ 1 ուղեւորի, որը մահացել է հոսպիտալացման ճանապարհին: Բժիշկները տուժածներ Հ. Խ.-ի եւ Մ. Բ.-ի առողջական վիճակը գնահատել է ծանր, իսկ Ա. Բ.-ինը՝ բավարար:
