Լոռու մարզի Շնող գյուղում մայիսի 10-ին տներից մեկում տեղի ունեցած հրդեհից մահացած 56-ամյա կնոջ դեպքով ձերբակալված կա: NEWS.am-ի տեղեկություններով, ձերբակալվածը կնոջ ազգականն է, որը փորձել է բռնի ուժով սեռական հարաբերություն ունենալ միայնակ ապրող, հոգեկան խնդիրներ ունեցող 56-ամյա Ս. Գ.-ի հետ, որից հետո հետքերը թաքցնելու համար հրկիզել է անկողինն ու ննջասենյակը:
Ավելի վաղ NEWS.am-ի հետ զրույցում Շնողի գյուղապետ Հովիկ Սահակյանը նշել էր, որ պարզվել է՝ տան հրդեհը բռնկվել է ննջասենյակում: Հոգեկան խնդիրներ ունեցող Ս. Գ.-ն տանն ապրում էր մենակ, ծնողները մահացել էին, եղբայրներից մեկը մահացել էր, իսկ մյուսն արտերկրում է: Իրեն էլ պարբերաբար հոգեբուժարան էին տանում, մի քիչ մնում էր, նորից վերադառնում էր:
Ավելի վաղ տեղեկացրել էինք, որ Հայաստանի ԱԻՆ-ում մայիսի 10-ին, ժամը 02.30-ին տեղեկություն է ստացվել, որ Լոռու մարզի Շնող գյուղում այրվել է տուն: Պարզվել է, որ Շնող գյուղի 2-րդ փողոցի տներից մեկի ննջասենյակում մասամբ այրվել է անկողին, իսկ մահճակալի վրա հայտնաբերվել է 56-ամյա Ս. Գ.-ի այրվածքներով դին:
