Միհրան Պողոսյանը «Պանամյան փաստաթղթերի» հետաքննության շրջանակում բացահայտված միակ հայազգի մեծահարուստը չէ, որ օֆշորային գոտիներում գրանցված ընկերություններ ունի: Տվյալների բազայի Հայաստան բաժնում 37 անուն կա: Պանամյան փաստաթղթերում կան նաեւ քրեական հեղինակություններ, սփյուռքահայեր, շատ են հատկապես Ռուսաստանաբնակները:
2009-ին Իրանում կործանված Թեհրան-Երեւան Տու-154Մ օդանավի վթարի համար մեղավոր է ռուսաստանյան նախագծող ընկերությունը եւ չվերթը սպասարկող անձնակազմը՝ եզրակացրել է հետաքննող հանձնաժողովը: Իրանական ընկերության օդանավը կործանվել էր 2009-ի հուլիսի 16-ին Թեհրանից 200 կմ հեռու: Բոլոր 153 ուղեւորները զոհվել էին: Ինքնաթիռում հայկական ազգանունով 35 ուղեւոր կար, որոնցից վեցը՝ Հայաստանի քաղաքացիներ, նրանցից երկուսը՝ անձնակազմի անդամներն էին:
Հայաստանում բժիշկները պնդում են, որ ադրբեջանական ագրեսիայի հետեւանքով վիրավորված զինվորները արտասահմանում բուժման կարիք չունեն, ծանր վիճակում գտնվող երկու տղաների ծնողները ուզում են նրանց անպայման Եվրոպա տանել բուժման: Նրանց չի համոզել նաեւ Հայաստան ժամանած գերմանացի բժիշկների եզրակացությունը, թե Հայաստանում բուժումը զինվորներին լիովին բավարար է: Ծնողների կարծիքով, էսթետիկ վիրաբույժ-ուռուցքաբանը եւ բժիշկ օրթոպեդը այն մասնագետները չեն, ովքեր կարող են նման եզրակացություն տալ ողնուղեղի վնասվածքներով վիրավորների բուժման մասին:
Համացանցում մեծ աղմուկ է բարձրացրել տեսանյութը, որում վաստակավոր արտիստի կոչում ստացած Արմենչիկը զորամասում շարքով իրեն մոտեցող զինվորներին տոպրակներով օգնություն է բաժանում՝ ժամանակ առ ժամանակ նայելով տեսախցիկին: Օգտատերերը պահանջում են, որ զինվորների հանդեպ նման ստորացուցիչ վերաբերմունք թույլ տված հրամանատարաները պատժվեն եւ կատարվածում մեղադրում են Պաշտպանության նախարարությանը: Պաշտպանության նախարարի մամուլի քարտուղարն ասել է, որ տեղյակ չէ՝ երբ եւ որտեղ է կատարվել նկարահանումը, մանրամասները պարզելու համար ուսումնասիրություններ են կատարվելու:
Երեկ կեսգիշերին Իսակովի պողոտայում տեղի ունեցած վթարի հետևանքով 2 մարդ է զոհվել: Իրար են բախվել Volkswagen եւ Mercedes մակնիշի մեքենաները, ինչի հետեւանքով վերջինը դուրս է եկել ճանապարհի երթեւեկելի մասից եւ բախվել ծառին: Մերսեդեսի վարորդը մեկ ժամ անց մահացել է հիվանդանոցում: Իսկ ուղևորներից մեկն էլ մահացել է հոսպիտալացման ճանապարհին: Տուժածներից երկուսին վիրահատել են, նրանց վիճակը հիմա բավարար է:
Բռնաբարության փորձ, խեղդամահություն, հրկիզում: Բոլոր այս հանցագործությունները վերագրվում եմ 23-ամյա երիտասարդին: Ենթադրվում է, որ նա նախօրեին այցելել է Շնող գյուղում բնակվող իր հեռավոր ազգականուհուն, որը միայնակ էր ապրում և հոգեկան խանգարումներ ուներ: Հարբած վիճակում 56-ամյա կնոջը առաջարկել է սեռական հարաբերություն ունենալ, իսկ երբ մերժում է ստացել, խեղդել է նրան, վերջում էլ ՝ հետքերը վերացնելու համար այրել անկողինն ու հեռացել: Կնոջ մարմինը գտել են առավոտյան կիսաայրված վիճակում: Փորձաքննությունը կպարզի՝ արդյոք կինը սեռական բռնության է ենթարկվել մինչեւ սպանվելը:
Երեւանում 27-ամյա տղամարդու դի են գտել կախված վիճակում: Գեղամի մարմինը գտել են հարազատները՝ խորդանոցում կախված: NEWS.am-ին հարեւաններն ասել են, որ երիտասարդ հոգեկան խնդիրներ ուներ, ամուսնալուծված էր, 3-ամյա տղայի հայր: Եբթադրվում է, որ նա ինքնասպան է եղել: Ի դեպ, այս տարվա 4 ամիսներին Հայաստանում 39 մարդ է ինքնասպան եղել: Այս տվյալը հրապարակել է ԱԻՆ «Ճգնաժամային կառավարման ազգային կենտրոնի» պետ Հովհաննես Խանգելդյանը: Ինքասպան եղածներից 33-ը տղամարդ է, 6-ը` կին, տարիքը՝ 18-ից բարձր:
Ֆուտբոլի Հայաստանի հավաքականի կիսապաշտպան Հենրիխ Մխիթարյանը հրաժարվում է երկարաձգել Դորտմունդի «Բորուսիայի» հետ պայմանագիրը, որն ավարտվում է 2017-ի ամռանը: Արտասահմանյան մամուլի փոխանցմամբ՝ պատճառն այն է, որ գերմանական ակումբը նրան առաջարկում է նոր պայմանագիր, որում չկա տրանսֆերի նվազագույն արժեքը, որին համապատասխան առաջարկ ստանալիս ակումբը պարտավոր է վաճառել ֆուտբոլիստին: Ըստ աղբյուրի՝ Լոնդոնի «Չելսիի» ղեկավարությունը կփորձի օգտվել ստեղծված իրավիճակից եւ ձեռք բերել Մխիթարյանին, որի ծառայություններով հետաքրքրված են նաեւ Լոնդոնի «Արսենալը» եւ Թուրինի «Յուվենտուսը»:
Դոլարի փոխարժեքն աննշան աճել է, եվրոյինը եւ ռուբլունը՝ նվազել: Դոլարն այսօր արժեր 479, եվրոն՝ 545, բրիտանական ֆունտը՝ 691, ռուսական ռուբլին՝ 7.22 դրամ:
Երեւանում մայիսի 11-ին սպասվում է կարճատեւ անձրեւ եւ ամպրոպ, առաջիկա գիշերը մայրաքաղաքում օդի ջերմաստիճանը կհասնի +13-ի, իսկ վաղը ցերեկը՝ +24 –ի: