Վանի Աղթամար կղզում անցկացված պատարագը հանգիստ չի տալիս թուրք ազգայնականներին, որոնց սարսափահար հայտարարությունները լսելիս, կարելի է կարծել, թե ուր որ է Արեւմտյան Հայաստանը շուտով կմիանա Հայաստանի հանրապետությանը: Նման խոսակցությունների նախաձեռնողը «Ազգայնական շարժում» կուսակցության ղեկավար Դեւլեթ Բահչելին է, ով հայտարարել է, թե իր կուսակցության 40 նահանգային ղեկավարների հետ պատրաստվում է հոկտեմբերի 1-ից սկսվող խորհրդարանական աշխատանքները սկսել 10-րդ դարում Հայաստանի մայրաքաղաք հանդիսացած Անիի մայր տաճարում նամազ անելով, ի հակադրություն Աղթամարի Ս. Խաչում իրականացված պատարագի:
Դեւլեթ Բահչելիի այս նախաձեռնությանն անմիջապես արձագանքեց Թուրքիայի տուրիզմի եւ մշակույթի նախարարը` նշելով, թե Բահչելին կարող է անհատապես նամազ իրականացնել ցանկացած մաքուր հաստատության մեջ, սակայն կուսակցության դեմքով եւ զանգվածային բնույթ կրող կրոնական միջոցառումը հակասում է Թուրքիայի Սահմանադրությանն ու կուսակցությունների մասին օրենքին:
Թուրք նախարարի այս խոսքին արձագանքեցին ազգայնական կուսակցության նահանգային կառույցների մի շարք ղեկավարներ, որոնց հայտարարությունների մեջ գերակշռում է այն քննադատությունը, թե ինչո՞ւ նախարարը թույլ տվել հայկական համայնք չունեցող Վանում իրականացնել պատարագ, կամ հունական համայնք չունեցող Տրապիզոնում թույլատրել պատարագ մատուցել Սումելայի վանքում: Օրինակ` Մերսինից ընտրված «Ազգայնական շարժում» կուսակցության պատգամավոր Աքիֆ Աքքուշը հարց է ուղղել թուրքական իշխանություններին, թե ո՞ւմ համար են բացվում հայկական եկեղեցիները, եւ քանի հոգի են կազմում այն անձինք, ովքեր աում են, թե իրենք քրիստոնյա են եւ պատարագ անցկացնելու տեղ չունեն:
Իսկ, ահա, Մանսիայից ընտրված ազգայնական պատգամավոր Էրքան Աքչայը պնդում է, թե Սումելայի վանքում պատարագի անցկացումը` ազդանշան էր հունական Պոնտոսի պետությանը: «Աղթամարի եկեղեցու պատարագը` մեր երկրի արեւելքում ստեղծվող հայկական կառույցով ցույց տվեց Հայաստանի նպատակակետերը»,-նշել է ազգայնական պատգամավոր Էրքան Աքչայը:
Թուրք ազգայնականների վախը հայերի կամ Հայաստանի նկատմամբ, նրանց կողմից արած հայտարարությունների կամ միջոցառումների միջոցով է արտահայտվում: Օրինակ` այս տարի ամերիկահայ լեռնագնացների կողմից Արարատի լեռան գագաթին հայկական դրոշների պարզումից հետո թուրք ազգայնականները սարսափած բարձրացան Արարատի գագաթ եւ պաստառներ պարզեցին, որոնցով «ոչ» էին ասում Արարատի գագաթին հայկական դրոշներ բարձրացնողներին: Կամ, նախորդ տարի, երբ ստորագրվել էր հայ-թուրքական հարաբերությունները կարգավորող արձանագրությունները, Դեւլեթ Բահչելին դիմել էր Էրդողանին եւ հայտարարել, որ ստեղծվելիք պատմական հանձնաժողովում քննարկման առարկա է դառնալու Արարատի Հայաստանին պատկանել-չպատկանելու, Թուրքիայի արեւելքը Արեւմտյան Հայաստան լինել-չլինելու հարցերը:
Հայկական Անիի մայր տաճարում թուրք ազգայնականների կողմից նամազ անցկացնելը եւս վկայում է նրանց վախի մասին` կորցնել այն հողերը, որոնք ձեռք են բերել 1,5 միլիոն անմեղ հայերի ցեղասպանելով:
Արթուր Հակոբյան