ԵԱՀԿ Մինսկի խմբի համանախագահների վերջին հայտարարությունը եւ ներկայացված առաջարկները հիմնականում համահունչ են ՀՀ նախագահ Սերժ Սարգսյանի ապրիլի սկզբին հնչեցրած դիրքորոշումներին: Այս մասին NEWS.am-ի թղթակցի հետ զրույցում նշել է Հայաստանի ԱԺ փոխնախագահ Էդուարդ Շարմազանովը՝ անդրադառնալով ԵԱՀԿ ՄԽ համանախագհների այսօր տարածած հայտարարությանը:
«Ծանոթացել եմ համանախագահների հայտարարությանն ու առաջարկությանը՝ կապված Վիեննայում Հայաստանի եւ Ադրբեջանի նախագահների հանդիպում կազմակերպելու հետ: Իհարկե, պաշտոնապես Հայաստանն իր դիրքորոշումը կարտահայտի, բայց մինչ այդ ուզում եմ ասել, որ ուսումնասիրելով այդ հայտարարության բառապաշարն ու արտահայտած մտքերը, դրանք շատ դրական եմ գնահատում»,-ասել է Շարմազանովը:
Նրա խոսքով, համանախագահների բառապաշարը եւ մտքերը հիշեցնում են ապրիլի սկզբին ՀՀ նախագահ Սերժ Սարգսյանի մեսիջները: «Նրանք խոսում են հրադադարի ռեժիմի ամրապնդման, վստահության միջոցներ ձեռքբերելու ուղիներ փնտրելու, բանակցային գործընթացը վերականգնելու մասին: Սա այն բառապաշարն է եւ մեսիջներն են, որոնց մասին խոսել է Սերժ Սարգսյանը, ինչը նշանակում է ՀՀ նախագահի մեսիջները ըմբռնում են գտել համանախագահների կողմից»,-ընդգծել է ԱԺ փոխնախագահը:
«Երկրորդ՝ այն գործիչների ու վերլուծաբանների հայտարարությունները, որոնք հոռետեսորեն էին մոտենում Սերժ Սարգսյանի հայտարարություններին՝ նշելով, թե նա կոշտացրել է իր դիրքորոշումը, եւ դա ընկալում չի գտնի միջազգային միջնորդների կողմից, հօդս ցնդեցին: Սերժ Սարգսյանի հստակ դիրքորոշումների արդյունքում Մինսկի խմբի համանախագահներն անում են առաջարկներ, որոնք բառացիորեն հիշեցնում են Սերժ Սարգսյանի դիրքորոշումները»,-ընդգծեց Շարմազանովը:
Ավելի վաղ NEWS.am-ը հայտնել էր, որ ԼՂ բանակցային գործընթացի վերսկսման համար Սերժ Սարգսյանը անհրաժեշտ է համարել երեք կարեւոր քայլ. առաջինը՝ վստահության հետաքննության մեխանիզմների ներդնում, երկրորդը՝ հասցեական հայտարարություններ եւ երրորդը՝ երաշխիքներ, որ Ադրբեջանը չի գնա նոր ագրեսիայի եւ ահաբեկչության ԼՂՀ ժողովրդի նկատմամբ:
