Նեւադայում հաջողությամբ փորձարկվել է հեռանկարային տրանսպորտային Hyperloop համակարգը, հայտնում է Reuters-ը: Էլեկտրամագնիսներով կառավարվող կցասայլակը, որն ավտոմեքենայի չափեր ունի, ժամում 160 կմ արագություն է զարգացրել, հայտնում է Lenta-ն:
Կցասայլակը բաց է թողնվել ռելսային ուղու վրա, հետո դրան թափ են հաղորդել` միացնելով էլեկտրամագնիսները:
Այս տարի նախատեսված է մշակել շարժումը լեւիտացիայի ռեժիմում: Այդ նպատակով Լաս Վեգասի շրջանում փորձարկման տարածքում արդեն խողովակաշարեր են տեղադրվել:
Hyperloop նախագծի վրա աշխատում է SpaceX, PayPal եւ Tesla Motors ընկերությունների հիմնադիր Իլոն Մասկի խումբը:
Նախագծի շրջանակում նախատեսված է խողովակաշարային տրանսպորտային համակարգ ստեղծել Լոս Անջելեսի եւ Սան Ֆրանցիսկոյի միջեւ: 600 կմ հեռավորությունը գնացքը պիտի անցնի բարձր նոսրության պայմաններում` ժամում մոտ 1,2 հազար կմ արագությամբ:
Աշխատանքների արժեքի ստորին սահմանը գնահատվում է 7,5 մլրդ դոլար: Նախատեսված է համակարգի շինարարությունը սկսել 2016-ին, 2018-ին այն պիտի ավարտվի: