Մայիսի 11-ի երեկոյան հակառակորդի կողմից արձակված կրակոցից մահացու վիրավորում է ստացել ՊԲ զինծառայող Արմեն Մարտիրոսյանը: 20-ամյա Արմենը Գեղարքունիքի մարզի Գանձակ գյուղից էր, ծնողների միակ որդին:
Եկել է Հայաստանի ու Ադրբեջանի նախագահների հանդիպման ժամանակը՝ հայտարարել են ԵԱՀԿ Մինսկի խմբի համանախագահները: Պաշտոնապես նախագահների հանդիպման տեղեկությունը կողմերը դեռ չեն հաստատում, սակայն չեն էլ բացառում: Մինչդեռ Մոսկվայում արդեն նախնական ամսաթիվ են նշել՝ մայիսի 16-ին, Վիեննայում: Ռուսաստանի արտգործնախարարության ներկայացուցիչը հայտնել է, որ Սերժ Սարգսյանի եւ Իլհամ Ալիեւի հանդիպմանն ամենայն հավանականությամբ կմասնակցեն ՌԴ-ի, Ֆրանսիայի արտգործնախարարները, ԱՄՆ պետքարտուղարը: Ըստ համանախագահների՝ հնարավոր հանդիպման օրակարգի հիմնական խնդիրը պետք է լինի հրադադարի ռեժիմի ամրապնդումը, վստահության մեխանիզմների համաձայնեցումը՝ բարենպաստ պայմաններ ստեղծելով բանակցությունների վերսկսման համար:
Հովիկ Աբրահամյանը ինչպես խոստացել էր, կառավարության նիստից առաջ հանդես է եկել հայտարարությամբ եւ ներկայացրել տնտեսական փոփոխությունները, որոնց անհրաժեշտությունն առաջացել է ապրիլյան քառօրյա պատերազմից հետո:
Առաջին քայլով կառավարությունն անցնելու է բյուջեի խնայողության խիստ ռեժիմի: Մյուսը՝ պետական կառավարման համակարգի օպտիմալացումն է: Վարչապետն ասաց՝ այն պետք է դառնա ավելի կոմպակտ, կլինեն կրճատումներ: Երրորդ ուղղությունը կոռուպցիայի դեմ պայքարն է: Պետական տարբեր մարմիններում կոռուպցիայի մակարդակը կգնահատեն նաեւ սոցիոլոգիական հարցումներով: Երկրի տնտեսությունը ախտահարող մյուս երեւույթը՝ շահերի բախումն է: Վարչապետը վստահեցրեց, որ դրա դեմ նույնպես պայքարելու են:
Բացի դրանից՝ մայիսի 14-ից կառավարությունը սկսում է ամենշաբաթյա քննարկումներ՝ ընդդիմադիր պատգամավորների եւ հասարարակական սեկտորի մասնակցությամբ: Վարչապետը խոստացավ, որ քննարկման արդյունքում ընդունված բոլոր որոշումները կարճ ժամկետում կյանքի կկոչվեն:
Կառավարության առջեւ այսօր բողոքի ակցիա են անցկացրել «Նորաշեն 2007» ընկերությունից տուժած բնակիչները: Նրանք ժամանակին բնակարաններ են գնել այդ ընկերության կողմից կառուցվող շենքում, սակայն կառուցապատողը նրանց բնակարանները գրավ է դրել ու դրա դիմաց տոկոսով խոշոր գումարներ վերցրել տարբեր մարդկանցից, այդ թվում՝ Ազգային ժողովի փոխնախագահ Հերմինե Նաղդալյանի ընտանիքից: Երբ կառուցապատողը սնանկ է ճանաչվել, Նաղդալյանի ընտանիքը եւ մյուս պարտատերերը պարտքի դիմաց վերցրել են բնակարանները: Ցուցարարները պահանջում էին հանդիպում վարչապետ հետ, որը տեղի չունեցավ: Փոխարենը նրանց մոտեցավ Նաղդալյանի ամուսինը, ամոթանք տվեց ու խլեց իր կնոջ պատկերով պաստառը:
Ապրիլյան պատերազմում վիրավորված եւ մինչեւ հիմա ծանր վիճակում գտնվող զինծառայողներ Արմանն ու Ռուբենը բուժում կստանան արտասահմանում, բայց ոչ թե կառավարության, այլ ծնողների որոշմամբ՝ բարերարների հանգանակած գումարներով: Կառավարությունը մինչեւ հիմա պնդում էր, որ նրանց ողնուղեղից վիրավորված տղաներին կարիք չկա տեղափոխել, նրանց այստեղ էլ կարելի է բուժել: Սակայն ծնողներին սա չէր համոզել, նրանք հավատում են, որ իրենց որդիները Եվրոպայում ապաքինվելու ավելի մեծ շանսեր ունեն: Արմանին եւ Ռուբենին ամենայն հավանականությամբ կտեղափոխեն Գերմանիա: Նախարարությունը խոստացել է օգնել կազմակերպչական հարցերում:
Հայկական կողմը պետք է օգտվի ստեղծված պատմական պահից, առաջ գնա շփման գծում եւ հետ բերի ապրիլյան պատերազմում կորցրած տարածքները՝ կարծում է Ժիրայր Սեֆիլյանը: Շուշիի առանձնակի գումարտակի հրամանատարի խոսքով՝ մարտունակ բանակն ամեն օր հրամանի է սպասում՝ հյուսիս-արեւելյան ուղղությամբ կորցրած տարածքներն ազատագրելու համար։ Չնայած ադրբեջանական բանակի սպառազինությունների առավելությանը՝ հայ ժողովուրդը այսօր ի վիճակի է ծնկի բերել հակառակորդին, ինչի համար անհրաժեշտ է համազգային մոբիլիզացիա:
Ձերբակալվել է ՀՀ ԶՈւ սպառազինության վարչության ավտոծառայության պետ, գնդապետ Դավիթ Աբրահամյանը։ Հարուցվել է քրեական գործ՝ պաշտոնյայի կողմից ծառայության նկատմամբ անփույթ վերաբերմունք դրսևորելու դեպքի առթիվ։ Քրեական գործի քննության շահերից ելնելով` այլ մանրամասներ նախաքննության այս փուլում չեն հրապարակվում:
Հայաստանում կրկին հղի կին է մահացել՝ այս անգամ ուշ հայտնաբերված տուբերկուլյոզի պատճառով: 34-ամյա Աննա Գրիգորյանը ապրիլի 7-ին տեղափոխվել է Երեւանի «Սլավմեդ» հիվանդանոց, որտեղ 6 օր մնալուց հետո մենինգիտ են կասկածել եւ տեղափոխել «Էրեբունի» հիվանդանոց: Այստեղ պարզվել է, որ կնոջ մոտ տարածված տուբերկուլյոզ է, նրան տեղափոխել են մասնագիտացված կենտրոն: Մի քանի օր անց Աննան վիժել է: Հարազատները մեղադրում են բժիշկներին, պնդում են, որ մահացած պտուղը ավելի շուտ հեռացնելու դեպքում Աննան չէր մահան, բժիշկներն էլ վստահեցնում են, որ իրենք ամեն ինչ արել են ըստ մանկաբարձական կանոնների: Աննան 12 տարվա անպտղությունից հետո սպասում էր երկվորյակների:
Հայաստանում կսահմանափակվի առանց դեղատոմսի վաճառվող դեղերի քանակը: Նոր օրենքը արդեն 2–րդ ընթերցմումն է անցել Ազգային ժողովում: Առողջապահության նախարարի խոսքով՝ սրա հիմնական պատճառը հակաբիոտիկների չարաշահումն է եւ դրա հետ կապված ռիսկերը:
Մեկնարկել է Կաննի 69-րդ փառատոնը, որին մասնակցելու համար Ֆրանսիա են ժամանել կինոյի համաշխարհային դեմքերը: Կինոփառատոնը արդեն երրորդ անգամ բացվել է Վուդի Ալենի ֆիլմով՝ «Cafe Society»: Առաջին օրվա պրեմիերաներից է հոլիվուդույան «Ֆինանսական հրեշը» ֆիլմը, որի գլխավոր դերերում Ջորջ Քլունին ու Ջուլիա Ռոբերթսն են: Իսկ մինչ այդ համաշխարհային կինոյի աստղերը անցել են ավանդական կարմիր գորգուղով:
Նեւադայում հաջողությամբ փորձարկվել է ապագայի գնացքը՝ Hyperloop գերձայնային տրանսպորտային համակարգը: Ավտոմեքենայի չափեր ունեցող այս կցա սայլակը կառավարվում է էլեկտրամագնիսներով: Նախատեսված է մինչև 2018 թվականը խողովակաշարային համակարգ ստեղծել Լոս Անջելեսի եւ Սան Ֆրանցիսկոյի միջեւ, որը նոր սերնդի տրանսպորտը կանցնի կես ժամում՝ ընթանալով ժամում 1200 կմ արագությամբ:
Այսօր բոլոր հիմնական արտարժույթները թանկացել են: Դոլարի փոխարժեքը կազմել է 479, եվրոյինը՝ 547, ֆունտինը՝693, իսկ ռուբլունը՝ 7.39 դրամ:
Մայիսի 13-ից-15-ը Հայաստանի տարածքում օդի ջերմաստիճանը կբարձրանա 5-7 աստիճանով: Երեւանում վաղը ժամանակ առ ժամանակ հնարավոր է կարճատեւ անձրեւ: Այս գիշեր մայրաքաղաքում սպասվում է մինչև 14, իսկ վաղը ցերեկը՝ մինչև 27 աստիճան տաքություն։